Rockopera Tommy in Hôrster dialect

26-05-2019 20.00 uur - Merthal, Gasthuisstraat 30, Horst

Wát is de ovveriënkomst tusse Rowwen Hèze, punkband de Heideroosjes, musicalster Renée van Wegberg en de pianiste Egbert Derix en Geert Keijsers? ’t Ziên stuk vur stuk muzikante die allemaol in binne- en boêteland ‘r spaore op muzikaal gebied verdind hebbe. Ma dát is ni ’t iënige: ze vinge allemaol ‘r wortels in de gemaent Hôrs án de Maas, ’n gemaent met ’n riêk veriënigingslaeve en vul (verschillende sorte) orkeste, die ’n bron vörme vur muzikaal talent.

Rockopera Tommy in Hôrster dialecte

2019 Is ’n bizoonder jaor vur de gemaente: Hôrs án de Maas viert zien 800-jäörig bestaon. Dit wúrdt groëts gevierd met verschillende evenemênte door ’t gânse jaor hin. De muzikaalste gemaente ván Nederland griept dees gelaegenheid aan um rock- en blaosmuziek same met zang te verwaeve tot iën groët muzikaal spektakelstuk. De legendarische rockopera Tommy ván de Who, din dit jaor precies 50 jaor geleje in Amsterdam in première ging, is speciaal heejveur gearrangeerd vur harmonieorkest en band en in ’t dialect hertaald. Oonder de naam ‘Tommy in ’t plat’ vinge op 24, 25 en 26 mei 2019  3 veurstellinge pláts in de Mèrthal in Hôrs. ’t Bizoondere is dát álle artieste en musici oêt de gemaente Hôrs án de Maas kome.

Rockmuziek en blaosmuziek verbinge

De 80 leje ván de Keuninklijke Harmonie ván Hôrs, ‘n rockband die bestiët oêt 5 muzikante oêt Hôrs en de 12 vocaliste oêt verschillende kerne ván de gemaente: álles beejiën zulle d’r zao’n 100 muzikante op ’t podium staon. ’t Initiatief vur dees samewerking is ván bassist Joep Vullings en klarinettiste Josien Vermeeren die zich gevónge hebbe in eur gezamenlijke leefde vur de rockopera Tommy ván the Who, ma allebei vánoêt ‘nen ândere âchtergroond: Joep is veuraal fan ván ’t oërsprónkelijke album en de “Live at Leeds”-versie terwiel Josien is opgegruijd met de klassieke versie ván The London Symphony Orchestra. Die twië werrelde, ván de rockmuziek en de toch klassiekere blaosmuziek, met iën verbinge, dát is krek wát d’r eind mei in Hôrs stiët te gebeure.

Renée van Wegberg ás Acid Queen

De muziek is speciaal vur dees gelaegenheid gearrangeerd door Jesse Passenier din in 2017 nag de Rogier van Otterloopriês kraeg ás miëst vulbelaovende componist. Extra-bizoonder is, dát de Horstenare Wim Hendrix en Ger Gubbels de tekste hebbe hertaald in verschillende Hôrster dialecte, waodoor elke vocalist zal zinge in zien eige modertaal; vocaliste, die, zoë ás gezâg, allemaol  gebaore en getaoge ziên in H֧ôrs án de Maas   en die ‘r spaore op ’t podium ál lang verdind hebbe. Zoë nimt Roy Verbeek, bekend ván Pigtail en ván zien samewerking met Guido’s Orchestra de titelrol ván Tommy op zich en is Musical-Awardwinnares Renée van Wegberg te zeen en te hure ás the Acid Queen.

Kaarte zien verkriegbaar via www.rockoperatommyhorst.nl. De veurstellinge ván vriedág 24 en zaoterdág 25 mei zien ál oêtverkocht.

 

← Ga terug