Veldeke Krink Ech nao “Mundart”-middig in Wegberg (D)

07-10-2018 15.00 uur - Flachmuseum, Kirchplatz 7 in Wegberg-Beeck

Op zóndig 7 oktoaber organiseertj ’t Flachsmuseum in Wegberg ‘ne “Mundart-mittag”. Det doon ze same mit Veldeke Krink Ech en de samestèllers van ’t Groat Maaseiks Waordebook (B), eder mit eige inbrèng. Thema’s zeen: wie de aangrenzendje dialecte klinke. Väöl wäörd kómme äöverein en ouch in oetdrökkinge en gezèkdjes is väöl äövereinkómst. Det is sjoan óm te huuere.

’t Museum zal op dae middig ’n aantal daovan naeve ein zètte. De biedrage vanoet Maaseik betruf ’t verzamele van wäörd en beteikenisse väör ’t Mezeiker waordebook, det in november oet kömtj. Veldeke Krink Ech zal es óngerwerp numme de spreukeroute oppe winkelstraot e.d. in Ech.

In de Duitse grensstreek haet ’t plat spraeke ’t moeilik. De jeug gebroektj ’t gaaroet neet mieë en de heemkundevereniginge zeen gerichtj op in standj haoje. ’t Bevordere van dialectgebroek zitj d’r volges hun neet in.

De middig weurtj gehaoje in ’t ’t Flachmuseum, Kirchplatz 7 in Wegberg-Beeck van 15.00 – 17.00 oer.  Waem interesse haet, is welkom in Wegberg-Beeck, vlak bie de kèrk. Dao is good te parkere.

← Ga terug