Biografische informatie euver Marleen Schmitz

Marleen Schmitz-Van Pol (1952) kump oet Mofert en wie ’t vieftig woor, begós ‘t mit sjrieve. Esse ’m vreugs worom toen pas, dan zal ’t zègke det ’t det van te veure neet durfdje. Eder probeersel koom biej ’t aad pepier terech.

Mer mit cursussen en workshops koom ’t op gang en stilkes aan kome verhaole en gedichte op papier: neet allein in ’t Mofers,  mer ouch in ’t Hollans en neet allein veur volwassene, mer ouch veur kinjer.

Toet noe toe zin d’r vief romans en ach kinjerbeuk van Marleen oetgegaeve. In oktoeaber 2018 kump roman nummer zès oet. In 2013 won ’t de Veldeke literatuurpries.

Wiltj nag g’r mieër weite, kiek dan op www.marleenschmitz.nl