Concert 45 jaor Veldeke Krink Ech

Viefenvieërtig jaor Veldeke Krink Ech weurtj dit jaor gevierdj mit ’n concert door ’t Reünie Orkes van de Limburgse Jagers op zóndigmiddig 19 juni a.s. óm 14.00 oer in de “Pejjehaof”, Houtstraot 7 in Ech. De leje van de Krink höbbe hiebie gratis toegang es se zich hieväör höbbe aangemeldj. De resterendje kaarte zeen vanaaf 1 juni in de verkoup väör anger belangstèllendje, leefhöbbers van dit orkes en kónne á 7,50 euro bestéldj waere  via de website. Nao bestèlling en betaling krig m’n ’n kaertje gestuurdj óm oet te printe of op de telefoon te zètte. Ein en anger zoa lang es zitplaatse besjikbaar zeen.

Het concert op 19 juni zal gevarieerdj van inhoud zeen; ‘ne greep in ’t oetgebrèdje repertoire van de Limburgse Jagers, wobie de bezeukers aan ’t ènj wie gebroekelik mit de witte zakdeukskes kènne zwejje! Speciaal is dit jaor eine z.g. “corona-koraal”, wobie ’t orkes de begeleiding  verzörgtj bie ’n dankgedich aan de zorgmitwèrkers. Tösse de meziek zal verder nog ruumte gebaoje waere väör o.a.  ènkel väördrachte door wènnieërs van de Veldeke-declamatiewedstried van dit jaor.