Coronagediechte vaan Lisa Naus

Vaanaof haaf miert plaots Lisa Naus oet Remund ederen daag e Coronagediech op häöre Facebookpagina. Die goon neet allemaol euver corona – gelökkeg neet – mah zien veural bedoeld um ederein dee ze leus e good geveul mèt te geve. Veer laote ‘rs hei e paar zien. Wee ze allemaol wèlt leze kint terech op de Facebookpagina vaan Lisa Naus.

CORONA-GEDICH 48: CORONA-TIED

Ofsjoon de tied liek sjtil te sjtaon
ich aaf en toe neet weit waatv’r daag ’t is
’t knoevele van mien kinjer en vrunj
’t allermeiste mis
biete de wiezers van de klok
ónaafgebraoke in d’n tied
en waat gewaes is, zin v’r kwiet.

Noe en den dinks se: ‘kós ich mer …’
aevel taege de corona-regels
vèlt nieks in te bringe
keuning keizer admiraal
idderein mót ’n teunke leger zinge.

Plök d’n daag, haaj mood, haaj vol
perbeer ’ns get nuujs, zo-mer, veur de lol
’t hoof neet perfek
moog waal lekker gek
höb achteraaf veural gèn sjpiet
det is pas ech zunj van de tied.

CORONA-GEDICH 47: GELÖK

Gelök kump op sjluufkes, gans ónverwach
brink op ’t gooj moment dich ’ne lach
soms löps se sónger bezej d’raan veurbiej
mer vèlt ’t dich op, den maak ’t dich bliej.

Gelök is ’t vlinderke in d’n haof
det dich tirvelend ’t veurjaor belaof
de maerel dae oppe daaksjpits zink
’ne glumlach dae dich wermte bringk.

Gelök is get óm van te fluite en te zinge
en óm veural rejaal mit óm te sjpringe
maak get dich bliej, laot ’t idderein wete
want gedeild gelök det is döbbel genete.

CORONA-GEDICH 45: MIEN MAEDJE

Mam jodelde vreuger heel get aaf
ouch es de rame wied aope sjtónge
biej ’t wasse, sjtrieke, vaege en sjroebbe
waerde ’t ein nao ’t anger leedje gezónge.

Van ‘Daar bij die molen’ toet ‘Ketelbinkie’
‘Postkoets’, ‘Ave Maria’, ze zóng mer door
’t ganse rippertwaar waerde aafgewerk
kompleet mit Parelvissers en Sjlavekoor.

Jao, mien mam heel waal van galdere
toch deej pap zien depe sjtum meer mit mich
es dae zaach zóng “Doe bös mien maedje”
veulde ’t veur mich wie ’n leef gedich.

Det leedje leet mich gleuje van binne
maakde mich verlaege, óm ’t grote waat ’t zag
es noe weer ’ns det milledieke vèlt te heure
veul ich de leefde van mien pepke nag.

 

 

← Ga terug