Daag vaan de Moojertaol ingehaold
Veldeke en Plat-eweg viere zaoterdag 18 miert d’n Daag vaan de Moojertaol. D’n internationaolen Daag vaan de Moojertaol góng veur Limburg op 21 fibberwarie vrij oongemèrk veurbij; ’t waor toen jummers vastelaovensdinsdaag. Op Haafvastezaoterdag haolt ’t L1 Radioprogram Plat-eweg samed mèt Veldeke Limburg dit in.
Eder jaor weurt door de UNESCO op 21 fibberwarie d’n Daag vaan de Moojertaol gevierd. Dezen daag steit in ’t teike vaan de taolkundeg en cultureel diversiteit en de mietaolegheid. Veur de UNESCO zien taole ’t instrumint um ‘t cultureel erfgood levendeg te hawwe.
Zaoterdag 18 miert steit in de oetzending vaan Plat-eweg ’t book Vastelaovesbeelde in Limburg vaan Leon hametrs en Hans Simons centraol. Dat book besjrijf ’t groetste deil vaan alle Limburgse Vastelaovendsmonuminte in beeld mèt foto’s meh ouch in wäörd. De besjrijvende tekste in ’t book zien twietaoleg. Einerzijds de streektaolvariant vaan de betreffende plaots en anderzijds de vertaoling in ’t Nederlands.
In Plat-eweg weurt mèt ach Limburgse Veldekekring stèlgestande bij ’n aontal monuminte en ’t daobij hurende verhaol.
- Veldek Remunj liet uuch kinnes make mèt de Aartsje oet ’t buurtsjap Asselt
- Veldeke Venrao geit op zeuk nao d’n achtergroond vaan ’t Pielhaas monumint
- Veldeke Mestreech stèlt de Mammoeters oet Potteberg aon uuch veur
- Veldeke Venlo vertèlt uuch mie euver ‘t Moeraskwakersbeeld in de wiek ’t Ven
- Veldeke Sittard zèt de Bornse Bessemebènjers centraol
- Veldek Weert nump uuch mèt nao Altweerterhei boe de Heikneuters jaorleks de vastelaovendsscepter zwejje
- Veldeke Heerle nump uuch via Oezbekistan mèt nao ’n defekte straotlantere in ’t Aambos
- Veldek Ech steit stèl bij ‘nen enorme zwerfkei in ’t riek vaan de Aester Sjaelen Uul oet Pey
Allemaolo te beluustere in ‘t programma PLat-eweg vaan L1 Radio zaoterdag 18 miert vaan 13.00 tot 16.00 oor.
