Declamatiewedstried Veldeke Krink Ech

Wie ’t ènj van de lockdown zich begós aaf te teikene, stónge de leje van de Wirkgroep Declamatie van Veldeke Kring Ech klaor óm te beginne. Dit jaor – nao 2 jaor óngebraeking – weer ‘ne declamatiewedstried te kènne organisere väör de jeug van de basissjoale woor de inzèt: gedichte oetzeuke, sjoale benadere, zale reservere ónger väörbehawd enz. Dus wie de mäögelikheid d’r inderdaad woor, stóng Veldeke Krink Ech klaor. En de kènjer bliekbaar ouch, want de belangstèlling väör deilname woor groat.

Aafgeloupe waekènj zeen de twieë regio-finales gehaoje in Pej (väör de kènjer oet de regio Ech) en in Zöstere. Vieftig finaliste kome dao väörbie! De krink Ech haw waal ’n oplossing mótte zeuke väör ’t feit det de Limburgse finale nog neet kós doorgaon. De nummers 1 kóste neet verder nao dae ieëretitel. In samewèrking mit de gemèndje Ech-Zöstere höbbe ze dao väör die kènjer einmalig ’n kampioensjap van ‘t “Smaalste stökske van Nederlandj” van gemaaktj. In de verwachting det volgendj jaor weer ’n Limburgse finale kan zeen.

← Ga terug