Drie kingerbeuksjkes in ’t Klummisj
Dörg Antoon Brouns (geb. op Klumme) zunt 3 nüj kingerbeuksjkes gesjrieëve in ’t Klummisj.
Wie ze vaerdig waore hat hae de teks in ’t Hollisj gesjrieëve. Daomit zunt de beuksjkes ouch gesjik vuuer lüj die gei plat kalle of kinne laeze. D’r oetgaever hat lüj in anger Limburgse plaatsje benaoderd óm de verhaole in hun dialekt óm te zètte. Die kómme nog. Dit berich geit bloos uuever de beuksjkes in ’t Klummisj.
Es pap loos Antoon Brouns zien kinger väöl vuuer of vertèlde ze zelf verzónne verhäölkes. Later deeg hae dat bie zien kleinkinger. De mieëste sjpas hawwe die went hae e zelf verzónne verhaol vertèlde. Da hejse die sjnütjes mótte zieë! Hae besjlaot ze op te sjrieve. ’t Zunt korte verhaole ómdat ’t zien ervaring is dat bie lang verhaole kinger al flot toebinge.
Uvveriges is Antoon Brouns al jaore aktief es sjriever bie Veldeke. D’r sjtónt al mieë es hónderd biedrages van häöm op ’t Sjrieverspodium en hae sjik gedichte en verhäölkes i vuuer Veldgewas, ’t online maondelichs blaad va Veldeke.
De drie beuksjkes gónt uuever e maeteke, ’t Lieske, dat get biezóngisj mitmak. In ’t ieësjte verhaol truf ’t e Avvermenneke, in ’t twieëde kump ‘t e Aekhäörke taege en in ‘t driejde hat ‘t sjpas aan e Miemke. Ze zunt es vervolg gesjrieëve, meh kinne appaart (vuuer)gelaeze waere.
‘t Verhaol uuever ’t Avvermenneke hat Antoon Brouns bedach ómdat hae zelf es kind get haw mit waezes die in grotte woeënde of in häöler. In ‘t Klummisje gehuch Krawbich besjting zoeë-eij verhaol es went ’t ech wieër.
Bie ’t Aekhäörke sjpieëlde dat hae dat joeksige deerkes vingk en sjpas draa hat óm te kieke wie die van tak nao tak “vlege”.
’t Verhaol uuever ’t Miemke hat te make mit de katte die ze vreuger bie häöm heim hawwe. Ein van die haw ’n sjoeën gruuetsje zjwatte naas.
De beuksjkes zunt te besjtèlle – es Pre order – bie Bullseye Publishing. Hie ónge d’r link.
