Dreejtalig leed euver streektale en dialekte door Stef Bos, Jacques-Paul Joosten en Adri de Boer
Dreej artieste, dreej tale
Stef Bos, Adri de Boer en Jacques-Paul Joosten bringe miertalig leed euver leefde veur modertale
Op 12 september belaef Beetsterzwaag in Friesland eine bizóndere muzikale primeur: ‘t nieje leed ‘Mijn Moedertaal’, in het Nederlands, Fries en Venloos. Adri de Boer zingk in De Buorskip ‘t nummer, det same met Stef Bos en Jacques-Paul Joosten is geschreve en ingezónge en det ein krachtig pleidoei vormp veur ‘t behald en de waardering van streektale en dialekte. Op ein later, noow nog ónbekind tiedstip, zal ‘t leed door de drie zengers gezamelik waere gebrach.
In ’t projek kómme de wereld van meziek en taal zich taege. Wao ’t Nederlands de nationale verbinding vormp, benaodrökke ’t Fries en ’t Limburgs de riekdóm en eigeheid van regionale tale. ’t Dreejtal wilt met dit leed laote hure det dialek en streektaal neet allein culturele erfstökke zien, maar det zeej ouk laevende tale zien, die minse verbinde euver grenze èn generaties haer.
Stef Bos
Adri de Boer presenteert as solis ‘t leed op 12 september in Friesland. Vanwaege d’n drökken agenda van Stef Bos, dae as inspirerende verbinder ein belangrieke rol speult in dit muzikale projek, vindt de officieële gezamelike presentatie later plaats. D’n datum wuurt ter ziener tied bekindgemak.
De samewerking van dees dreej muzikante pas in ein breier programma wao in de modertaal centraal steit. Ierder brachte Adri de Boer en Jacques-Paul Jooosten al werk van Stef Bos oet in ’t Fries en in ’t Venloos. Eur samewerking ónderstreep det meziek en taal hand in hand gaon en det zinge in de eige modertaal ein krachtig middel is um identiteit en verbóndeheid te viere.
Mijn moedertaal (Mien Modertaal)
Met dit nieje leed wille de dreej muzikante neet allein herte rake, maar ouk ’t maatschappelik gesprek euver streektale versterke. ’t Fries en ’t Limburgs zien officieël erkind in ’t Europees Handves veur regionale tale en dialekte, maar staon in de praktijk dök ónder drök. Ein projek as dit mak zichbaar en huurbaar wie waerdevol taaldiversiteit is veur cultuur, ónderwies en samelaeving. ’t Leed is te beluustere op Spotify ónder ‘Mijn Moedertaal’
Ein leed, dreej stumme, dreej tale en eine gezameliken oproop um gruuets te zien op ós modertaal.
