Veld(j)eke Bekèt, Kwartaalblaad van de Krink Ech

Verhäölkes, gedichte en anger stökskes vórme de óngerdeile van ’t kort geleje oetgekómme nummer van ’t kwartaalblaad van Veldeke Krink Ech. Dit alles gesjreve door lede of anger bie de krink betrokke persoane. Det levertj ’n sjoan bloomlaezing op, alles in ’t dialek natuurlik.

Zoa vèndj g’r dao ’n sjoan, al get aojer gedich van zaliger Piet Zits oet Zöstere äöver de herfs. Dao-äöver sjrif ouch Toos Schoenmakers-Visschers oet Postert. Mer ouch recente gedichte van Wil Vergoossen, Jan Maas en Mia van Wegberg. Opvallendj is ’n gedich äöver de aafbraak van de Pius X kerk. Rinus Mulders besjrif wie ’n aoj kèrkbank van ’t klaoster in Lilbosch in Achel is terech gekómme en de bandj tösse die plaats en Ech. En ’n verhaol van Annie Schreuders-Derks äöver de twieë vrouwe van keuning Zwentibold.
Dit nao aanleiding van de Heiligdomsvaart, die deze zomer weer in Zöstere woor.

Verder nog 2 door kènjer (allein of mit hulp van hun aojers) gemaakdje gedichte, die ze väörig jaor höbbe gedeclameerdj bie de declamatiewedstried. Ze gaon äöver “Mien breurke” en “Exzeem”.
Piet Aben brunk weer ’n vervolg van de rubriek “Waem kèntj ze nog?”, aoj, bienao vergaete wäörd toegelichtj in ’n kort gedichske.

Väöl te laeze dus in dit nummer van Veld(j)eke Bekèt: jaorgank 6, nummer 4.
Dao-in staon ouch de activiteite van de aafgeloupe maonje kort verslage (mit foto’s) en waere de kómmendje activiteite aangekondigdj. Leje van Veldeke
Krink Ech kriege dit blaad 4 kieër p’r jaor.
Interesse? G’r kèntj èns ’n nummer opvraoge: