FABULA – film in ‘t Venloos dialek

’t Zal óg neet zien óntgaon, en inmiddels dreit de niejste film van Michiel ten Horn in ’t hiele land, en dus ouk in de ganse provincie, det d’r ein film is gemak, gespeuld door top-acteurs wie Fedja van Huêt en Sezgin Guleç, die haos gans in ein Limburgs dialek, namelik ’t Venloos, wuurt gespraoke.

’t Verhaol is losjes geïnspireerd op ’t verhaol van d’n hashkeuning van Venlo, in de Venlose volksmónd ouk waal geneump ‘de Pienda’, dae in de jaore ’80 en ’90 furore haet gemak as hashhandelaer.

De film luuet zich ’t bes classere as comédie noire. Ein sterrecas haet d’r aan deilgenaome en Bas Vissers, bestuurslid van Veldeke Limburg, haet de aafgeloupe jaore de acteurs Venloos gelierd. Gót allemaol kieke, ’t resultaat is zier de meujte waerd.

De film dreit in ’t ganse land in de diverse bioscope en filmhuus. De première waas op 10 april.