Fèlm Limburgia koumende vriedag op tèllevisie

Op vriedag 3 november is um 21.20 oor op NPO 3 de fèlm “Limburgia” te zien. Limburgia vertèlt ’t verhaol vaan de commandant vaan ’n sjötterij dee per se nog ‘ne kier sjöttekeuning wèlt weure. Meh op d’n daag vaan ’t keuningssjete geit alles mis. Iemes anders sjut de vogel aof en zien vrouw veroongelök mèt d’n auto. Wat d’r gebäört es daonao bij häöm alle stoppe doorsloon, dat moot geer zelf mer goon bekieke.

Boeveur is de fèlm bezunder? Op de ierste plaots umtot ’t verhaol gans in eus provincie is opgenome en dat lievert prachtege beelde op, dat kint geer uuch wel veurstèlle. Op de twiede plaots umtot d’n hoofrolspeuler Michiel Kerbosch eigelek oet Amsterdam kump en ziech speciaol veur deze fèlm Mestreechse les heet genome. Veldeke is in de persoen vaan Bèr Brounts, dee heet opgetrooje es dialek coach, nej betrokke gewees bij dat projek.

En nog ‘ne reie veurwat de fèlm bezunder is: umtot ouch bekinde Mestreechtenere wie ’t Duo X-Elle ’n rol speule. Ze speule twie marketensters vaan de sjötterij en dat doen ze mèt väöl euvertuiging. En mèt prachtege pekskes! Mieneke Bakker, bekind vaan Toneelgróp Mestreech, späölt de vrouweleke hoofrol. De rezjisseur is Noël Loozen, dee is opgegreujd in Mestreech meh noe in Amsterdam woent. Limburgia is ein van de zes bekroende fèlms veur de serie One Night Stand, dee jong rezjisseurs de kans gief ziech te oondersjeie. Kieke dus! Vriedag 3 november um 21.20 oor op NPO 3.

← Ga terug