Fèlmpremière “Eind Dingk’ euver Vleisboeket
Aofgeloupe zaoterdag, 9 november, voont in ’t Royal Theater in Remund, de première plaots vaan de fèlm “Ein Dingk” euver ’t aofsjeidsconzèr vaan de Remundse vastlaovendsgróp Vleisboeket. Vleisboeket is/waor ’n band die veural oonder jonger vastelaovendsvierders furore heet gemaak mèt stevege beats en spetterende shows. Documentairemaakster Maud van der Varst volgde de veurbereiinge veur de groete finaleveurstèlling in 2018 en verzamelde mie es 70 oor beeldmateriaol.
Vaan achteraofzäölkes nao de groete podia
Dat materiaol woort gemix mèt awwer opnames van optrejjes vaan de gróp, oondermie bij de Sjtasiefestasie Remunj en bij “D’n 11 vaan d’n 11e” in Mestreech. En die beelde woorte weer aofgewisseld mèt oetgebreide interviews mèt alle zes lede vaan de band, die vertèlde euver wie ’t gekoume waor, vaanaof ’t allerierste begin, wie ze in achteraofzäölkes van dörpskaffees koelek plaots hadde um mèt z’nen zesse op ’t podium te stoon tot optrejjes veur tiendoezende lui.
Staonde ovatie
De good gevölde zaol vaan ’t Royal Theater beloende de makers vaan de fèlm nao aofloup mèt ’n staonde ovatie. Oet de fèlm woort al wel dudelek tot versjèllende lede ’t neet gemekelek hadde um definitief aofsjeid te numme. De woordveurder zag in zien daankwoord daan ouch nogal kryptisch tot ze de fèlm good kóste gebruje veur es ze nog ins ‘ne kier aofsjeid zouwe numme. En ’t geröch góng al tot binnekort toch nog ’n optrejje gepland waor.
Zoondag 1 december publieksveurstèlling
De fans kinne ziech veuluipeg tegood doen aon d’n documentaire “Ein Dingk”. De première waor nog veur e beslote gezelsjap meh op 1 december aonstaonde zien publieksveurstèllinge veurzeen. Keertsjes zien binnekort verkriegbaar via de Facebookpagina vaan Vleisboeket.
Veldeke sponsort
Zoe’ne documentaire kint neet tot stand koume zoonder subsidie en sponsorbijdrage. L1 TV geit de fèlm in jannewarie koumend jaor oetsjikke. De provincie Limburg en de stad Remund droge bij in de productiekoste. En ouch Veldeke Limburg huurde bij de begunstegers. En dat doen veer neet veur niks. ’t Liekent noe vaanzelfsprekend tot de Limburgse taol mèt de vastelaovend de bovetoen veurt, meh dao waor ‘nen tied tot ouch in eus contreie d’n flawweköl vaan André van Duijn en Ria Valk de euverhand dreigde te kriege. Oonder mie de opriechting vaan ’t LVK heet dat tij gelökkeg wete te kiere. En Vleisboeket is/waor ‘ne geslaagde exponent vaan die oontwikkeling.
Foto’s Miami Vleis-conzèr: Mark Richter