Festival Sjiek: Nui Limburgs Taol- en Cultuurfestival

Mèt literatuur, meziek en toneel oet Limburg

Op zoondag 21 jannewarie 2018 vint in de ECI Cultuurfebrik in Remund Festival Sjiek plaots. E gratis touwgaankelek festival vaan 11.00 tot 18.00 oor boe-in ’t gesjreve, gesproke en gezoonge Limburgs én Nederlands woord centraal steit in optrejjes, interviews en workshops. Zoe is dao meziek vaan beveurbeeld singer-songwriter Stephanie Struijk (ouch wel bekind es Stevie Ann), ’t Frans Pollux Trio, de funkrockband Moeders Mooiste en ’t Limburgs Fanfare Orkes in samewèrking mèt de zangeresse Linda Zijlmans, Maud Willems en Dyanne Sleijpen. In d’n theaterzaol vaan de ECI Cultuurfebrik is oondermie ’t stök Ich bau dir ein Schloss vaan Toneelgróp Mestreech te zien. Ouch zien dao workshops vaan oondermie Stephanie Struijk (leedsjes sjrieve) en MadLipz Parkstad.

Literatuurpries

Tijdens ’t Festival weurt ouch de winner vaan de Sjiek Literatuurpries bekind gemaak. De pries weurt door de jury, dee besteit oet Daan Doesborgh, Jolien Linssen en Pierre Bakkes, touwgekind aon ‘ne recente versjene Nederlandstaolege roman dee ‘ne link heet mèt Limburg. Versjeie sjrijvers zoewie Wil Boesten, Govert Derix, Ton van Reen, Willem Kurstjens, Frans Budé, Colla Bemelmans, Ger Bertolet en Octavie Wolters, weure tijdens Festival Sjiek geinterviewd en/of drage veur oet eige werk. ’t Compleet program vaan Festival Sjiek en de genomineerde veur de Sjiek literatuurpries stoon op de website vaan ‘t Festival.

Organisatie

Sjiek is ’n initiatief vaan ’t Taol en Lèttere Platform Limburg (TaLep). De in TaLep samewèrkende Limburgse streektaol- en literatuurorganisaties zètte ziech in veur e stimulerend en vernuiend taolklimaat in Limburg boe-in streektaol en literatuur florere. Mèt de organisatie vaan Festival Sjiek en de Sjiek Literatuurpries wèlt TaLep hei-aon bijdrage. Festival sjiek riech ziech op de twietaolegheid vaan Limburg: zoewel ’t Nederlands es ’t Limburgs stoon op 21 jannewarie naodrökkelek in de sjienwerpers. Kiek veur e compleet euverziech vaan de deilnummende organisaties op de website vaan ‘t Festival.

← Ga terug