Festival Vocallis zèt Limburgse taol op meziek
Meziekfestival Vocallis en Veldeke Limburg höbbe sinds verleie jaor e partnersjap. In ’t kader daovaan nump Vocallis eder jaor e Limburgstaoleg oonderdeil in zie program op. Deze kier is dat e gediech vaan Har Sniekers oet Thoear dat aonslut bij ’t thema vaan ’t festival 2022: “De krach vaan meziek”. Bezunder is tot dat gediech door ‘ne componis speciaol veur ’t festival op meziek weurt gezat.
Conzèr in de Kopermeule in Vaols
De meziek bij dat gediech weurt tijdens e conzèr gezoonge door twie vocaliste, sopraan Bibi Ortjens en bariton Vincent Kusters. Ze weure op piano begeleid door Michelle Lynne. Dat conzèr vint plaots op vriedagaovend 4 november in de Kopermeule in Vaols vaanaof 20.00 oor. Neve de comopisitie-opdrach weurt oondermie ouch werk vaan Schubert en Schumann gezoonge.
Korting veur Veldeke Lede
D’n entree bedreug € 15,00 meh lede vaan Veldeke kinne dit conzèr bijwoene veur de speciale studentepries vaan € 7,50. Geer kint eur (studente)keertsje bestèlle op de website vaan Festival Vocallis. Es geer daan aon de receptie melt tot geer vaan Veldeke zeet, daan maag geer met korting nao binne.
’t Gediech wat Har Sniekers sjreef veur ’t Festival geit es volg:
Mèt meziek
Trómme op de telder
mèt mets en versjèt
of zès bitterballe
broesendj in ’t vèt …
is det meziek?
En de dónderslaag
op eine heite zomerdaag
of det boenkeboenke
den van de scan …
is det ouch meziek?
Meziek vertèltj verhaole vol veur en fantasie
hèltj ós van weeg toet graaf kómpenie.
Meziek plektj plaosters op de deepste sneje
en wiltj ouch toew vinsters ‘n oetzich beje.
Meziek geuftj mèt eine breie zaochte kwas
kleur aan geveules en grieptj dich dèk vas.
Kruuptj mèt häöre geis gans in dien waeze
en kan door sjoeanheid allein al genaeze.
Har Sniekers
