FUNS!

D’r kump ‘n derde veurstelling van ‘t theaterprogram Funs! Zoeë waas mien laeve. De veurstellinge op 29 oktoeëber en 1 november in Theater Maaspoort in Venlo zien allewiels oetverkoch, vandao dus ‘n extra veurstelling op zaoterdaag 31 oktoeëber.

Zenger-regisseur Sef Thissen, pianis-componis Egbert Derix en filmmaeker Rob Hodselmans hebbe eur hand inein geslage um same dees hiel bezóndere veurstelling op de plenk te bringe euver de iconische Venlonaer Funs van Grinsven (1908-2003) wao in meziek, verhaole en documentaire beelde hand in hand gaon. Aan de hand van zien leedjes, noeëts ierder vertuinde archiefbeelde en gesprekke mit zien twieë döchter neme zeej ós mit door ‘t laeve van Funs.

Alwin Grijseels schreef ‘t script en Derix componeerde nieje meziek op gedichte van Van Grinsven die neet allein ‘n plek kriege in de veurstelling maar ouk op ‘n nie album det tiejes de Nach van’t Limburgs leed zal waere geprissenteerd. Op ‘t album, det mit steun van Stichting Henric van Veldeke tot stand kwaam, hure we naeve Derix en Thissen ouk klarinettis Leo Janssen (Metropole Orkest) en multi instrumentalis Emil Szarkowicz (dae ouk in de theaterveurstellinge zal meispeule). Kaarte veur de veurstelling via Maaspoort.