Gé Reinders oontvingk Veldeke Oeuvrepries 2018

De Remundse zenger Gé Reinders oontvingk de Veldeke Oeurvepries 2018. Dat maakde Veldeke Venlo veurzitter Henk Buskes zaoterdagmiddag bekind in ’t L! radiioprgram Plat-eweg.

Buskes prijsde Reinders veur zien indrökwekkende carrière en ’t umvaankriek oeuvre die dat de aofgeloupe decennia heet opgelieverd. De pries weurt jaorleks touwgekind door de Venlose aofdeiling vaan Veldeke en oetgereik tijdens de Nach vaan ’t Limburgse leed op 15 september.

Tegeliekertied prizzenteert Gé Reinders deen aovend ouch zien nui CD “Oetblaoze” die heer opnaom mèt ’t orkes vaan de Nederlandse Douane oonder leiing vaan Björn Bus. Dit gratis touwgaankelek concert vint plaots in de Frans Boermanszaol vaan Theater de Maospoort in Venlo.

Reinders toende ziech in ’t Plat-eweg ziert vergöld met de pries. Heer neumde ’t eztra bezunder tot de pries weurt oetgereik e paar daog nao ziene 65e verjaordaag en samevèlt mèt de prizzentatie vaan zien nuiste album “Oetblaoze”.

De Veldeke oeuvrepries weurt sinds 2007 touwgekind door Veldeke Venlo. Me iert daomèt ’t oeuvre vaan ‘nen arties dee ziech in zien of häor carrière op ’n bezunder meneer verdeenstelek heet gemaak veur de Limburgstaolege meziek

Op dees meneer heet ziech ’n indrökwekkende ierelies gevörmp : Jan Theelen (2007), Hannelore Winter (2008), Wooden Chain (2009), Sjef Diederen (2010), Ben Verdellen (2011), Nol Wassen (2012), Guus Smeets (2013), Um&Um (2014), Jack Vinders (2015), Thei en Marij (2016), Henk Steijvers (2017) en noe dus Gé Reinders in 2018.

 

← Ga terug