Groet Mestreechs Dictee 2017

Dit is d’n officiëlen teks vaan ‘t Groet Mestreechs Dictee 2017, zoe wie dee is opgestèld door gouverneur Theo Bovens.

Gans Limbörg bak

1. Lek vinger, lek doum, of, dzju wat is dat heerlek, dink iech dèks es iech deen Hollandse kemikke zenger, mèt die sjeif mojl en dat kerstaanjelebroen haor, aon ’ne grenache zeen beginne of aon e tuurtsje wat liekent op frangipane, mèt fitselkes sjókkelaat.
2. Noets zalste in zoe’n tèllevisieprogram verduts kriege wieste ordenteleke appelekouwe-, kroonsele-, wortele-, riggelaote- of molberevlaoj moos make.
3. Vaan ’ne gouverneur weurt verwach tot heer mèt zie geziech in de ploej in eder pläötske, dörpke of stedsje eder aongebooje hepke of drenkske aonnump.
4. Iech oontkom neet draon die zake persoenelek en veur ’t publiek ziechbaar tot de lèste grummel fatsojndelek en appetietelek op te ete.
5. Daogeleks drei stökker versjèllend gebeks griemelentere opete huurde bij de opveujing in mien ierste jaor in dit amb.
6. Wie g’r kint zien aon mie posteur woort de werkelekheid nog royaoler, zeker es iech beveurbeeld de aspergediners mèttèl.
7. In eus contreie verkoupe veer jummers streekprodukte es delicatès, wie in ’t zuie ’nen opzat of pièce montée, of, noordeleker, makrönsjes mèt brojn völling en petitfourkes vaan cake mèt smeiege gesókkerde roum.
8. Bezunder gruuts zien veer in Limbörg ouch op alderlei soorte broed wie pómpernikkel (wat veer gere mèt rommedoe nöttege), boterpistoleekes, mèlkbroejer, stevemennekes of mik: dao is hei niks tets aon.
9. Soms it d’n Hollender ’tzelfde, meh hèt ’t aanders.
10. ’t Is daan zjus es-of e gerech op z’n Hollands flawwer smaak es op ze Mestreechs.
11. Zègk noe zelvers: ‘e videeke’ smaak toch beter es ‘een pasteitje’, neetwoer?
12. Tot neet ederen Hollender wèt wat speebagk, kroephäönsje, huidvleis, geruikvleis, druugweurs, rokkelaoj of lomel is, is miech evels um ’t eve.
13. Laot miech mer plezereg lije aon al wat dees prachtege provincie miech te ete en te drinke gief.
14. Aperpo, moch geer compassie höbbe gekrege: zjustemint, dat waor perceis d’n opzat … nein, neet dee mèt gesmolte sókker!