Hoes veur ’t Limburgs heet ’ne website

’t Fysieke oonderkoume vaan ’t Hoes veur ’t Limburgs in De Weerstand in Remund steit nog in de verbouwingssteigers, meh digitaol heet ’t Hoes al ’n plaotsgekrege op internèt. Op de nuie website prizzenteert ’t Hoes ziech aon de Limburgse bevolking in zoewel ’t Nederlands es in mie es vijf versjèllende Limburgse dialekte. Mètwèrkers vaan Veldeke Limburg höbbe de aofgeloupe weke hun bès gedoon om al die lappe teks te vertaole in good Limburgs. En ’t rizzeltaot maag dao zien.

Op de website vint geer neve actueel nuits en agenda ouch oetgebreide informatie euver de doelstèllinge vaan ’t Hoes, euver de Limburgse taol, euver ’t Limburgs in ’t oonderwies, in de zörg, in kuns en cultuur en euver de digitalisering vaan ‘t Limburgs. Ouch kint geer dao mie te wete koume euver de partners (boe-oonder Veldeke) die ’t Hoes meugelek  make en euver projekte die op stapel stoon of kinne weure aongevraog.

’t Is de meujte weer um ins te goon kieke wat geer dao allemaol kint vinde. Daan hoof geer mer hei te klikke.