In Memoriam Frans Walraven

Eil laeve veur taal en ‘t dialek

Veer gedènke vandaag Frans Walrave, ein van de veursjténjesj van ’t Zittesj dialek. Frans is gesjtòrve op 5 juni 2026 in de laeftied van 86-jaor.

Frans waar neit allein eine taalkundige, mèr auch docent Nederlands en eine grote deskundige van Limburgs dialek en ’t Zittesj in ’t biezònjer. In versjeiene functies waar Frans besjtuurslid van Veldeke Krènk Zitterd en later auch nog ès veurzitter van Veldeke Limburg. Ouch waar hae ein van de kar-trèkkesj van de Wily Dols-sjtichting en veurzitter van de vereining veur Dialek- en Naamkunde (VLDN). Vanoet dees hoedanigheid waar Frans dans kortbie betròkke bie de oprichting van ’t Hoes veur ’t Limburgs.

En dat allenei mèr veur ein doel: D’r veur zörge dat zien geleifde Zittesj dialek behauwte bleef en mit góng in de nuuje tied. Daoveur sjreef hae énkele buiker en naosjlaagwirke euver de lokale sjpraok, zo wie de taalkundige oetgaaf ’ ‘t gruin buikske’ en kort gelee nog het naosjlaagwirk ‘Klanken van Sittard-Geleen’.

Nog ummer broesjde Frans van ideeje. Zo sjtarde hae vlak veur zien haergaon nog ein nuuj intiatief om auw weurd vas te légke.

Ouch bénne zien professie waar Frans ummer bezig mit taal. Hae is jaore docent Nederlands gewaes aan ’t Kleesj en later nog bie de lerareopleiding aan de Fontys. Door zien grote deskundigheid euver de Nederlandse sjpraok en het dialek, hauw me aan Frans ummer eine gedege bron. Hae koosj dat vol verve, op ein begriepelikke wieze en veural mit humor oet de duik doon.

Names Veldke Limburg wille veer Frans dan auch postuum bedanke veur alles waat hae haet gedaon veur ós sjone dialek en veer wunsje zien femieje, geleifde en naobesjtaonde gans väöl storkde in de kómmende tied.

Reg van Loo, praezes
Thijs Peeters, secretaris

foto (c) Luc Lodder