Interview mèt Pieter Kiewied

In de Nuutsbreef vaan december 2016 vaan Veldeke Limburg steit ’n oetgebreid interview mèt Pieter Kiewied, de bekinde radioprizzentator vaan ’t L1 program “Posbös 31”. Pieter kin enthousiast vertèlle euver zie felicitatieprogram. Zoonder väöl meujte lepelt heer de ein anekdote nao de ander op. Zoe sjrieve väöl lui häöm in ’t Nederlands meh vraoge oetdrökkelek of heer hun felicitaties in ’t plat wèlt veurleze. Zelf zien ze neet zoe good in ’t sjrieve vaan hun dialek, meh dat is wel de taol die ’t kortste bij hun steit en boe-in zie hun kinnese en femilie aonspreke. Pieter zit op zoondagmörge miestal gans allein in de studio vaan L1 in Mestreech. Heer sjakelt zelf de microfoon in en oet, heer start zelf de meziek en ordent oondertösse alle breve en mailkes die heer in de loup vaan de week oontvaange heet. Dat geit häöm good aof, behalve daan dee kier wie heer ziech zelf had boetegeslote en d’r niemes waor um häöm weer binne te laote. Toen heet heer de security mote belle um zie program toch nog op tied te kinne prizzentere.

 

← Ga terug