Jo Hansepries 2019 veur Netty-Engels-Geurts

Al mie es daarteg jaor kint de Stiechting Jo Hansenpries veur Volkscultuur dreijaorleks ‘ne pries touw aon persoene en/of organisaties die op ’n bezunder meneer bijdrage aon ’t behaajd vaan de Limburgse volkscultuur. De Laureaat vaan 2019 is Netty Engels-Geurts oet Sjinne vaanwege häör verdeenste veur de volkscultuur op culinair gebeed. Op goonsdag 19 juni aonstaonde reik gouverneur Theo Bovens de Jo Hansenpries aon häör oet. Dees plechtegheid vint plaots in ’t stadhoes vaan Remund en begint um 18.00 oor.

De Limburgse keuke

Eder drei jaor weurt mèt de Jo Hansenpries e specifiek aspek vaan de Limburgse volkscultuur oonder de aondach gebrach, zoewie beveurbeeld meziek of literatuur. Veur 2019 heet de jury gekoze veur ’t culinair aspek. Tot daobij de käös is gevalle op Netty Engels-Geurts (Roggel, 1941) is neet zoe verwunderlek. Zie is op culinair gebeed jummers ’n oetgesproke otoriteit en heet oondertösse veerteg (kook)beuk op häöre naom stoon. Die bevatte neet allein e geweldeg aontal recepte in alderhand variaties meh ouch väöl advieze. Door studie (arsjiefwerk, naovraoge, reacties vaan lezers) greujde häöre kinnes euver de Limburgse keuke aonzeenlek. Daoneve heet ze al häör recepte mèt häöre maan oetgeperbeerd en zoenudeg aongepas en verfijnd.

Mie es ‘nen hobby

Netty Engels-Geurts verdeepde ziech ouch in produkkinnes en de materie vaan ’t koke. Zie woort diëtiste en daoneve docent aon de diëtisteopleiing, boeveur ze ouch ’n deil handbeuk sjreef. Later woort ze hoof vaan de Voedingsdeens in ’t veurmaoleg hospitaol in Sittard. Häör oetgaankspunt es diëtiste is tot op d’n daag vaan vendaog: ’n dieet en ‘ne good verzörgde smakeleke maol zien ziech neet strijeg. In tegedeil: ze goon hand in hand.

Stiechting PIT

Minder bekind veur väöl lui is tot Netty Engels-Geurts ouch hiel actief is veur persoene mèt ander meugelekhede, zoewie lui mèt ’t syndroom vaan Down, otisme en ADHD. Vaanoet häör eige stiechting PIT (Persoenleke Interpretatie Therapie) en mèt gebaseerd op de ervaringe mèt häör dochter Peetjie, beejt ze intensief begeleiing. Dit beperk ziech neet tot Nederland allein: zoe waor ze mie es twinteg jaor ing betrokke bij projekte veur lui mèt ’t Downsyndroom in Tsjechië, Slowakije en Luxemburg. Momenteel is ze actief op mie es daarteg sjaole in Kenya boe volgens de Persoenleke Interpretatie Therapie weurt gewèrk aon taolvörming (oondermie mèt behölp vaan leesmethodes). Heiveur verblijf ze minstens twie kier per jaor in Kenya.

Euver de Stiechting Jo Hansenpries

De Stiechting Jo Hansenpries woort in 1987 opgeriech door e gezamelek initiatief vaan de vereineging Veldeke Limburg en de Stiechting EK/CS te Remund. De Stiechting liet ziech bij de touwkinning vaan de pries advisere door ’ne oonaofhaankeleke jury. Dee bestoont dit jaor oet Pierre Bakkes en Guus Urlings. De pries is geneump nao de Remundeneer Jo Hansen, dee väöl beteikend heet veur de volkscultuur in allebei de Limburge, en besteit oet ‘ne rink mèt ‘t stadswaope van Remund, e geldbedraag vaan € 750,- en ’n oerkonde. Ieder winners waore ondermie Paul Weelen, Annie Schreuder-Derks, Frans Pollux, Jack Poels, Frans Boermans, de twie hermenieje vaan Thorn en Heemkundevereineging Roerstreek.

← Ga terug