Lang zullen we leven! Nui book vaan Annie Schreuders-Derks

Op zaoterdag 27 mei is in bookhandel Dominicanen in Mestreech de versjijning vaan e bezunder book gevierd mèt ’n openbaar en veur ederein touwgaankeleke lezing vaan Annie Schreuders-Derks.

Nao de veerdeilege Limburgse Almanak “De hele santekraam” oet 2021 versjijnt noe ’t opus magnum vaan Annie Schreuders-Derks: Lang zullen we leven, Limburgse tradities en gebruiken van wieg tot graf.  Al ruim 35 jaor vertèlt Annie in lezinge ’t verhaol vaan ’t Limburg vaan vreuger. Wat veur gebruke, tradities, geweentes, gezègdes en leedsjes, spreuke en symbole späölde ’n rol in Limburg vaan zoe’n iew geleie? Wat veur kleier droge de lui, wat aote ze? ’t Katholicisme späölde nog ‘n hiel naodrökkeleke rol, de landbouw en zien väöl facètte waor nog sterk present, ’t bijgelouf waor euveral aonwezeg.

Um dat verhjaol te kinne vertèlle heet zie verzameld, geleze, geluusterd en gekeke. Doezende objekte verzameld, väöl beuk doorgespit en mèt väöl lui kinnes oetgewisseld en gesprekke geveurd. Ein en ander leide tot de opriechting vaan de Stiechting NostalNu en oeteindelek ouch tot de totstand kouming vaan ’t Museum van de Vrouw in Ech. Want de rol vaan de vrouw door de iewe heen is häör altied ’t mies blieve boeje.

Aon de hand vaan de levesloup besjrijf ze in “Lang zullen we leven” ’t Limburg wat laankzaam meh zeker aon ’t verdwijne is. Vaanaof de geboorte volge veer e minseleve. Geboorte duip, verleefheid, trouwe, sterve, dat zien hoegtepunte oet ’t leve vaan ‘ne Limburger of Limburgse.

In dit 384 pagina’s tèllend, gans in kleur geïllustreerd book mèt hel kaf in ‘n prachtege vörmgeging vaan Luiz Oliveira besjrijf Annie Schreuders-Derks ’t daogeleks leve zelf. De väöl bezeukers vaan häör lezinge zalle ziech groetendeiuls herkinne in dit verhaol. De dialekstökskes in ’t Zösters zien hiel good euver te bringe in ander Limburgse variante en zien dao dèks mèt klein versjèlle bekind. De väöl aofbeeldinge verheldere ’t beeld wat veer höbbe euver eus veurawwers en hun geweentes.

’t Book “Lang zullen we leven!” is te koup veur € 34,90 in de bookhandel.