Lidioom: De reenk vaan Tante Lidioom

Name wie Klotterboke en Taas Daamde (aaflevering van vurge waek), woveur zól me die gebroeke in einen teks? Ich dink det ze ei saort  versering zien, wie blomebek aan de gevel, ein roos op d’n  hood, tattoos desnoods. Wie Trump weggesjtump waerde, trumpde ’t in alle dörper. Nae, det kan bao nieks mit (L)idioom vandoon höbbe.

Kónne name det waal, idiomatisch geneump waere? En waat zien det, name. Zuug:

Ik weet je naam wel, maar hoe wil je heten:
Springveer, Wilde, Kleine Clown, Vogelhaar,
Brood Dat Je Proeven Moet Om Op Te Eten,
Tot Ziens, Adieu, Nooit Meer of Toch of Maar?

Ich vinj dit sjiek – ’t is van Hans Andreus (1926-1977), oet Sonnetten van de kleine waanzin (1957). Name? Wie wils dich heite, mien Tante Lidioom, wen ich sjtrakkes wiejer gaon, aone oetgezatde waeg en weitesjap, sjravelentaere door de toterleize.

Ach, mesjiens guf ’t toch echte idiomatische achtername. Ze sjtamme oet ’t Nedersaksisch deil van ’t keuninkriek der Nederlanden. Ich neum: Oonk (oeremiens op ’t Munsterplein in Remunj), oetgaever Tjeen Willink, Buunk, Weenk. Det zien name die gein naeve naeve  zich kónne höbbe. ’t AN kint gein wäörd die besjtaon oet eine lange klinker gevolg door eine naasklank. Eine naam wie Roeng Meenk zól van Herman Finkers kónne zien.

’t Mesjtreechs aevel kint die waal: dae klaank is laank vaan zaank, noonk Pie is z’ne reenk kwiet (sjteit neet in ’t waordebook, det reenk –  ich heur ’t waal). Kint emes miense eine mit zoe’ne achternaam? Die mótte dan – mit verklaoring – in ’t volgend Jaorbook van Veldeke kómme.

Bön ich noe aan ’t zeivere? Ich heur al luuj deenke: dae zal waal per waord betaald waere. Nou nae, Lidioom is bald aafgeloupe, bao alles gezag, en dan mót ich wiejer mit die Lust am Text. Mót ich daoveur eine nuje naam bedinke? Wie duit me det? En waat zól ‘nuuj’ zien?

Ich hauw get Limburgs klinkende achtername verzónne, wie Aliksen. De sjoenste vónj ich Mujerbaeks, dae ich aevel gaaroet neet bedach hauw; die baek woor neet wied biej mich weg, net in Zjwame. En waat dach geer van twie Bintse name in Remunj. Besjtäönde name. Ich bön dao vreuger dökker langs gefits, um te kieke of ich det neet verkierd gezeen hauw, eine winkel in de Zjwartbrooksjraot, en dae winkel, dao sjting baove: Kardurk-Gramtinne. Gank dao ins taengenaan verzinne…

Reagere? redactie@veldeke.net of veldgewas@home.nl

 

Lidioom is eus rubriek euver ‘t eigene vaan de Limburgse taol. Alle veurgaonde aoflieveringe kint geer trök vinde in eus arsjief.

 

 

 

 

 

← Ga terug