Lidioom: Meister Kaolen, waem is det?

Achtername en Lidioom: dao kan me hiel get mit. Mae det ‘get’ mót waal deenstig zien veur verhaole. Ich kreeg inkel ‘echte’ Limburgse name gesjik, wobiej Tonnaer, Aben, Bongers en Dings. Prima, mae lever zien mich name wo get van Oos Taal in te óntdekke is. Mesjiens wone d’r róndj Ech mier Abens es in de res van Nederlandj biejein, mae ’t waord zelf (Aben) liek mich neet erg Limburgs.

Dinks waal? Zeker, mae dae naam höb ich neet gevónje. Waal kump Dink ei paar maol es veurnaam veur. Neet in Limburg, dink ich, den waat duit me det wich aan… Lekker dink van mich. Nut dink.

Noe bön ich obbernuuj op eine verkierde waeg belanjd. ’t Guf doezjende  pagina’s euver name, veural achtername. Neet aan te beginne. Zien Van Melick en Van Helden Limburgse name wiel die plaatse noe in Limburg ligke?

Zeker neet: dao zit nieks bezunjers van Oos Taal in. Name in verhaole zien veural veur de couleur locale of de joeks. Laote v’r haope det ’t nag ins eine sjtreekroman in ’t Limburgs guf; wen dao dan eine Jaap Smits in veurkump, dae door ziene sjarrel Mies Bakker ram in de poejer getummerd waert, dink jederein: Hollenjers.

Waat wil ich noe?

Ich dink det ich allein get gaon kuite mit name die in dae sjtreekroman dae d’r mesjiens noets kump, of in verhaole good gebroek kónne waere. Trök nao Van Helden – dae naam kump ei paar doezjend maol veur, door gans Nederlandj. Eine naam wie Van Meyel of Vanmeil besjteit neet. Verklaoring in Mael (Meijel): eine Van Helden is zoe geneump wiel eine wieje veurvader oet Helje keem. Dae is dao van ermooj vertroch, mesjiens waal weggejaag. De vreuger miense van Mael hoofde neet voert: dao woor ’t paradies.

Nieks te paradieze, nao Schreurs, dao mótte v’r haer. Iers aevel get algemeins. Wie de achtername opgesjreve zien, in d’n tied det Napoleon hiej de baas  sjpeelde, höbbe det dinkelik Hollenjers gedaon. Of wie mót me angers verklaore det in oos name gein AO veurkump. Dohmen én Daemen sjpraeke v’r allebei oet es ‘Daome’, Hovens is Haoves, en dae Hover dae vreuger biej ós in t dörp woonde, det woor menier Haover. Bekker Laove in Remunj zól de lekkerste flaaj höbbe, Vaessen is Vaose, mae Coolen woor nörges Kaolen.

Allei, mit dae bekker zien v’r aangekómme wo ich ’t euver wól höbbe: dudelik Limburgse name. Volgende waek.

Reagere? redactie@veldeke.net of veldgewas@home.nl

 

Lidioom is eus rubriek euver ‘t eigene vaan de Limburgse taol. Alle veurege aoflieveringe zien trök te vinde in eus arsjief.

 

 

 

 

← Ga terug