Lidioom: Ónbesjoef  veur Tintin

Dach ich mich van die dinger es det det van dich aaf te zien, höb ich dao dartig jaor haer al euver gesjreve. Waal ei bietje angers. ’t Góng doe euver ‘t es lidwaord biej vrouwelikke veurname. Det zoot zoe. Ich sjreef doe jeder waek de taalrubriek Letterbak. In dae van 020690, getiteld Niet zo leuk voor vrouwen, vroog ich mich (mit ei vrouweblaad) aaf of in ’t Limburgs ouch of väöl ‘vrouwonvriendelijkheden’ zólle zitte.

Begin dan mit det sjrikkelikke ‘t, reep eine vrouwelikke collega (ich dörfde neet collegaatje te sjrieve). In ’t zuje van Limburg haet me ’t euver ’t Leen of dito Bertha. Mich sjteurde en sjteurt det neet, en ich sjreef det det gebroek waal oetsjturf, den: ‘haet al emes van ’t Joyce geheurd?’

Nou, ich dink det ’t gebleve is, zeker in ’t Kirchroas. Gluif mich of neet, ich noom mich veur ’t book AUWHOOR van Paul Weelen blindj aope te make veur te kieke of ich mich mós sjame. ’t Waerde pagina 112, en ich zoog dao sebiet d’r Frens sjtaon, nag ins, en doe ’t Jreta, paar regels wiejer  opgeveurd es ’t Jreetsje.

Nou ja, zeker ei verhaol euver vreuger. Det beteikentj nag neet det me euveral ’t Kimberley zag det… heurt. Ao nae? ’t Zal zeker ins gezag waere, door pubermaedjes: ’t Joyce van Daan, det… Mae noe dees zin: Höbs se gezeen waat ’t Greta noe weer veur teun oethaolde… Sjtrapatse. Greta is hiej de beroemde klimatiste Greta Tintin Eleonora Ernman Thunberg (geb. 2003). Is ’t Greta (Jreetsje dus) hiej dan neet ei bietje nao ónger dujend?

Liek mich waal. Neet zoe netjes dus, Stop the war on woman, mae waem geit det ‘bietje’ weitesjappelik waoge?

In Mesjtreech zól me det ónbesjoef neume, um mit ‘het’ (’t) nao ein vrouw te verwieze. Zaet me. En wen me det zaet zól ’t waal ins – of dökker – gebäörd zien. En noe mótte v’r weer wiejer mit die veurnaamwäörd, zeen ich. Veer? Sjleip ich uch mit? Ach, ‘vanaf 2 juni opent Bonnefanten eindelijk weer haar deuren’, zaet mich ei mailtje. Haar?

 

Lidioom is eus wekelekse rubriek euver ‘t eigene vaan de Limburgse taol. Alle veurege aoflieveringe (oondertösse mie es 80!) zien trök te vinde in eus arsjief.

 

 

 

← Ga terug