Lidioom: Tekskes waere teks

Zuug, bekiek uch: Ic was in mijn hoofkijn om cruyt gegaen. Wie? Waat? Det is ein van de bekindste dichregels oet ’t Middelnederlandjs. Gesjreve door Suster Bertken (gesjt. 1514). Hae zingk al daag door miene kop, dae regel. Woveur klink det zoe prachtig, krek wie ’t Egidiuslied: Egidius waer bestu bleven / Mi lanct na di gheselle mijn / Du coors die doot du liets mi tleven // Dat was gheselscap goet ende fijn (…) Kump det door die net neet vraem taal? Is det geliek al det Ingels allewiel? Media en reklaam meine det veer meine det det baeter klink umdet ’t boetelandjs, Amerikaans is – ich kóm dao neet good oet. Ouch umdet de Vlaomse wielrenner Evenepoel dao doorhaer fits, meis taenge de morge, wen ich wil verstaon waat de maerelinke zinge. Evenepoel, waat eine naam – en hae is neet wie eine pool, nae eine tsunami. Nag.

In de vurge aaflevering van Lidioom sjting: Gaon v’r wiejer mit die Lust am Tekst. ’t Algemein deil woor klaor, noe kump plezeer plaats óngerwies en weitesjepkes. Mich geit ’t um plezeer MIT ’t Limburgs, Oos Taal, det dök besjete dialek. Plezeer IN det Limburgs is mesjiens get fiener, mae me kan det ouch laeze es: lol, lache, kwatsj, móppe gesjréve in ’t Limburgs. Ich höb nag aan joeks gedach. Baeter mae net get väöl van kaffee en toeptaofel. Trök nao Egidius? Dae haet veur get angers gekaoze, hae is wied weg gegange: Nu bestu in den troon verheven / Claerre dan der zonnen scijn / Alle vruecht es di ghegheven (…) Alle vreugde – zoeget?

  • En wie wils doe det doon, jungske?
  • Ja meister, prachtige wäörd opsjrieve, oetdrökkinge opgeraap langs der beekjes boord, weeld’rig sappig woordgewas.
  • En danne?
  • Ich haop det oos sjrievers dao get mit doon. Sjoner sjrieve. Höbbe de laezers ouch plezeer aan. Guf häör gooddoons. Kiek ins waat ei waord meister: OO DD OO.
  • Doe bös geweun nómmer 567 in Nederlandj dae sjriefcursusse guf.
  • Nae meister, Lidioom is geine cursus, ich lang de luuj get waat de Vlaominge alaam neume. Grei um get goods mit te doon. Sjrievers mótte daomit gaon tummere. Ich dink aan de veugel die zich tekskes biejein zeumere um eine tummer (aaflevering 076) te make. Ein weeg. Nes. Kiek ins meister: tekskes waere teks, waat wilt geer nag mier?
  • Det good gesjreve waert. Wo blieve de jóngere.
  • Ach meister, dae Evenepoel is klamp twintjig en hae duit die angere al get op de haor.
  • Sjrieve is gein wielrenne, menneke.
  • Ao nae? Sjrieve is fitse nao den troon verheven.
  • ich dink dets dich get mit Suster Bertken höbs.

Reagere? redactie@veldeke.net of veldgewas@home.nl

 

Lidioom is eus wekelekse rubriek euver ‘t eigene vaan de Limburgse taol. Alle veurgaonde aoflieveringe zien trök te leze in eus arsjief.

 

 

 

← Ga terug