Limburgdag 2025 in Stokkem/Berg aon de Maos
Op zaoterdag 19 aprèl kaome in Stokkem (B) lui oet gans Oos en Wes Limburg same um te gedinke tot mie es 180 jaor geleie Limburg gesjeie woort in e Belsj en e Nederlands deil. Dat woort beslote bij ’t verdraag vaan Londe en de inwoeners vaan Limburg woort daobij neet nao hun meining gevraog. Noe is ’t laankzamerhand ’n traditie aon ’t weure um op 19 aprèl ’n bijeinkoms te organisere um de verbinding tösse de twie Limburge, die nog altied besteit, al waor ’t mer door de gezameleke taol, te bevestege. Dit jaor waore Stokkem in Belsj en Berg aon de Nederlandse kant vaan de Maos aon de beurt um die verbinding symbolisch te viere. Zoewel Veldeke Bels(j) Limburg en Veldeke Limburg NL wèrkde dao-aon mèt.
De bijeinkoms begós in Stokkem, boe in de Sint Elizabethzaol lezinge en veurdrachte euver de historie vaan Limburg woorte gegeve en ouch dialekgediechte en -meziek woorte geprizzenteerd. Bezunder waor de veurdrach door Kyvan Ritrovato vaan ‘t gediech ‘Jungske vaan Stokkem’ wat jaore geleie gesjreve woort door Jef Steutelings. Um aon te geve tot ouch de Limburgse jäög aon de Belzje kant ‘t spreke vaan dialek neet verlierd is. Daonao góng ’t gezèlsjap riechting veerpoont boe nog mie Limburgstaolege poëzie woort veurgedrage. Op ’t veer woort daonao nog ’n plaquette oonthöld. Aon d’n euverkant góng ‘ne historischen optoch vaan start mèt Bellemaan Ed Gravee veurop, gevolg door de herremenie, de fanfare, de sjötterij, en Ton Theelen in eine vaan zien oldtimers mèt fokloristisch gekleide dames op de achterbaank.
In ’t Multi Functioneel Centrum vaan Berg voont de res vaan ’t program plaots. Dat veel nog bekans in ’t water umtot de maan dee veur de techniek zouw zörge ziech op ’t lèste momint mós
aofmelle. Meh mèt get kuns- en vleegwerk kós alles toch doorgoon, al waore de op video-opgenome welkomswäörd vaan Huub Stapel en Theo Bovens pas aon ’t eind vaan de middag te zien. Felix Bergers, veurzitter vaan Veldeke Bels(j) Limburg kreeg de zaol plat mèt ’n poëtische performance boebij de kreet “Crisis Crisis Crisis” de leidraod vörmde. Wim Kallen (foto) droog e gediech veur euver de Maos en interviewde in eine weeg door cineas Robin Peters, dee oonder mie bekindheid kreeg door zien videoclips veur John Tana.
En zoe góng ’t nog eve door: um te toene tot de jäög ouch mètdeit droog Jonas Konings e Limburgs gediech veur. Paul van Loo zóng de klassieker “’t Is nog noëts zoë donker geweës”. Dan Vanhoudt zong mèt väöl bravour twie nómmers, vaan Bob Dylan en vaan Ben Howard, die heer in ’t Limburgs vertaold had. Op e groet sjerm woord de videoclip vaan ‘t ’Maaskèntj Volksleed’ getoend en Guus Steinen gaof teks en oetlag bij zie protesleed ‘Dat wille v’r neet’, wat vervolgens door de ganse zaol woort mètgezoonge. En ouch ’t LVK-leed ‘Zwoa heat Bertha ’t bedoeld’ kaom nog veurbij. Al mèt al ‘ne geslaagde middag dee aontoent wie väöl leve in de Limburgse cultuur aon twie kante vaan de Maos zit.