Limburgs Heukske in Ós Blaedje

In Midde-Limburg, Remunj, Roerdale, Maasgouw en Ech-Zöstere versjient vanaaf väörige maondj ’n kènjergezèt. Speciaal samegestèldj väör de jeugd van groep 5 tót en mit 8 van de basissjoale. ‘t Doel is: kènjer aan ’t laeze te kriege en te haoje. Die gezèt weurtj mäögelik gemaaktj door o.a. biedrages van de betreffendje gemèndjes en verspreid via de basissjoale. De ieëste nummers zeen good óntvange. De nuuj kènjerkrantj is ’n gewuuen, dus Nederlandstalige gezèt, mer dreug es titel: “Ós Blaedje”. Daomit is dudelik det ze ouch aandach wille sjinke aan ’t dialek.

Speciaal doon ze det op de bladzij “Limburgs heukske”, mit aandach väör leuke Limburgse wäörd, beukskes, spelkes enz. In ’t lèst versjene nummer ouch ’n gesprek mit twieë wènnieërs bie de Limburgse declamatiewedstried, allebei oet Ech-Zöstere. Ruud Roumen, väórzitter van de wirkgroep declamatie van Veldeke Krink Ech ging mit ze in gesprek. En ’t bliektj det ze bès waal get te vertèlle höbbe äöver oos dialect: woróm ze ’t zelf spraeke, woróm ’t zoe mótte blieve. Mer ouch in welke situaties se ’t good waal en baeter neet zoews kènne gebroeke. Zoa perbeertj dit Limburgs heukske in “Ós Blaedje” de jeugdige laezers hie-äöver te laote naodènke.