Melicker laesplenkske

Veer hadde al ’n ganse rij Limburgse leesplenkske meh Melick had nog geint. Dao is noe verandering in gekoume. Marc Heemels heet gezörg veur e Melicker Laesplenkske. Veur de spelling vaan de wäörd heet heer kontak gehad mèt Pierre Bakkes, de veurmaolege streektaolfunctionaris. Dus dat zit wel good.

De teikeninge zien vaan Math Heckmans en Leo Heemels. En ’t oontwerp en de vörmgeving zien vaan Joey Geraets. De opbringste vaan de verkoup zien veur ’t behaajd vaan de kèrkklok (anno 1337) vaan de Heilegen Andreaskèrk. Same kump me wijer.

‘t Laesplenkske kos 15 euro en is te verkriege bij Slagerij Beulen, Markt 4 of bij Oetsjpanning De Meuleberg, Waterschei 71, allebei in Melick.