Mestreechse ‘Nijntje geit fietse’ geprizzenteerd

In de Nijntje winkel aon de Kesselskade in Mestreech is goonsdagmiddag ’t ierste exemplaar vaan de Mestreechse oetgaof vaan ‘Nijntje geit fietse’ euverhandeg aon aajd stadsprins Jerome Slakhorst. ’t Beukske woort häöm aongebooje door de vertaoler Bèr Brounts, lid vaan ’t provinciaol bestuur vaan dialekvereineging Veldeke. Noël Fabry laos daonao d’n teks vaan ‘Nijntje geit fietse’ veur aon de aonwezege. Zoe zuut dat oet in ’t Mestreechs:

Daan fiets iech langs de vijver
Dee vijver is hiel groet
Dao zwumme witte eende in
Die bring iech daan get broed

Daan fiets iech door ’t bos
Dat is hiel lesteg huur
Want dao stoon hiel väöl buim
Good kieke boe iech stuur

En tegeneuver eder veer regels stoon netuurlek de bekinde teikeninge vaan Dick Bruna. ’t Is euvergens ’t twiede deil vaan Nijntje wat in ’t Mestreechs vertaold is; ieder versjeen al ‘Bomma en Bompa Pluis’. ‘Nijntje geit fietse” is te koup in de Nijntje winkel en kos € 6,95.

← Ga terug