NRC besteit aondach aon Limburgse taol

In de landeleke gezèt NRC-Handelsblad stoont op 21 jannnewarie 2017 ’n artikel euver eus Limburgse taol. Aonleiing is de versjijning vaan ’t Elektronisch Woordebook vaan de Limburgse Dialekte aon ’t eind van veureg jaor. In feite is de e-WLD de digitaal versie vaan de serie Limburgse woordebeuk die al langer in gedrökde vörm zien versjene. Wat dat betröf is dus niks nuits oonder de zon. Meh doordat me noe ouch op de computer de versjèllende dialekte kint opzeuke weurt de touwgaankelekheid daovaan veur ederein e stök gemekeleker. Ech gemekelek höbbe de samestèllers vaan dit Elektronisch woordebook ’t de bezeuker evels nog neet gemaak: gebruuksvruntelek kin me de website neet ech neume. ’t Vereis ’n flinke poortie gooje wèl um d’ne weeg te vinde in al die variaties die de Limburgse dialekte kinmèrke.

De redacteur vaan NRC sjijnt ziech dao evels neet aon te sture. Dee verwoondert ziech veural euver wieväöl versjèlle in woordgebruuk en oetspraok tösse de plaotse en dörpe in Limburg veurkoume. Allein al veur slappe koffie kint ’t Limburgs tientalle wäörd, zoe melt heer. En ’t mies verpópzak is heer nog euver ’t feit tot ’n fluit in ’t ei dörp veur penis steit en in ’t ander veur vagina. Qua variatie spanne de wäörd veur “penis” euveregens de kroen: mer leefs 153 versjèllende wäörd kint ’t Limburgs daoveur. Heer melt neet of veer daomèt ‘ne kans make um in ‘t Guiness Book of Records te koume mèh mesjiens is ’t de meujte weerd um dat ins oet te zeuke. Al is de vraog of veer us dao-op mote laote veurstoon. Wee ’t compleet artikel oet NRC wèlt lezen kin dat hei vinde.