Nui blomlezing vaan gediechte vaan Har Sniekers

Tijdens ’n bijeinkoms vaan “Café op zondagmiddag” in Thorn is op 16 november 2025 ‘ne gediechteboondel geprizzenteerd vaan d’n Thornse dialekdiechter Har Sniekers. Heer moch ’t ierste exemplaar vaan dee boondel zelf in oontvaangs numme oet han vaan veurzitter Peter Bokken es ’n ierbetoen veur zien jaorelang bijdraog aon de literair cafés vaan Torna Cultura, die noets vergees e beroop op häöm doge. D’n titel vaan de boondel is Gedichten, mèt de naodrök op “dich” um aon te geve tot Har Sniekers veural veur zien lezers sjrijf en neet allein veur ziechzelf.

Peter Bokken laos twie gediechte oet de boondel veur, boebij heer stummeg begeleid woort door fluitis Leo Stratermans. Ein van die twie gediechte steit hei-oonder te leze.

Misse

Stilstaond op ’t strandj
zeen iech de wie zieë
en dink aan dich
guns
aan de uueverkantj

Veulde ich in mien handj
me rein traon oet dien ouge
van leefdje of verdreet
of
heel ich dich mer vas
aan ein vaemke van diene jas

Det waas mich lever
es hie die ganse zieë

‘t Is mer vuuer ’n jaor of twieë
zags se

In de gaard bluje de blomme
en de kese zien al riep
ich wil d’r dich waal gaeve
mer mien handj reiktj
neet zoea wied

Nao aofloop stoonte de bezeukers in de rij veur e beukske en ’n handteikening. D’n diechboondel is in ’n beperkde oplaag gedrök. Ein exemplaar kos € 10,00 (exclusief versjikkoste) en is te bestèlle door e mailke te sjikke nao harriesniekers@live.nl.

Har Sniekers is ouch eine vaan de redacteure vaan Veldgewas, ‘t online magazine veur Limburgstaolege poëzie. Geer kint dao hei mie euver leze.