Nui book veur Mestreechse kinder: Nog mie vrundsjes

Nao ’t succes vaan ‘Vastelaovendsvrundsjes’ oet 2016 góng Vivianne Rijnders medein weer aon de geng um e vervolg op de Mestreechse verhäölselkes te make. Ze geit mèt häör hooffigure, d’n twierling Mila en Nol, e jaor door Mestreech en zien tradities en plaotse boebij ze vaanzelfsprekend hiel get avonture mote doorstoon.

Ouch ‘Nog mie vrundsjes’ heet illustraties. Meh in tegestèlling tot ’t ierste book is dao geinen illustrator aon te pas gekoume. De kinder vaan Juffrouw Vivianne oet Sjaan höbbe de teikeninge bij de verhaole gemaak. En dat ouch nog zoe tot ze door andere weer kinne weure ingekleurd.

De prizzentatie vaan ’t nui book is op goonsdag 14 november aonstaonde um 16.00 oor in Bookhandel Dominicanen in Mestreech. Daobij zalle zier speciaol gaste hun opwachting make. Netuurlek is ’t gehiel en al in de sfeer vaan Sinterklaos. ’t Book is te koup veur € 14,90. ‘Nog mie vrundsjes’ is ‘n oetgaof vaan Oetgeverij TIC in de Lilili-reeks.

← Ga terug