Nui: Limburgs liere spelle mèt ‘nen app

Speulentere Mestreechs liere sjrieve? Dat kint mèt de foonkelnuien app Speulentere Spelle! Door alderhand opdrachte en späölselkes oet te veure weure alle regels en valkojle vaan de Mestreechter taol behandeld. Wee alle opdrachte good heet volbrach, geit e nivo hoeger, boe de regels weer get lèsteger zien. En zoe wijer tot me alle spellingsregels vaan ’t Mestreechs oonder de knee heet.

D’n app is oontwikkeld door de Veldeke Krink Mestreech en de Limbörgse Academie. Veurluipeg wèrk d’n app allein veur ’t Mestreechs meh dee is zoe ingeriech tot heer gemekelek kint weure umgezat veur ander Limburgse dialekte.

Spelle weurt e speul: ‘roojem’, ‘zjeniaol’ en mie

Speulentere Spelle beujt gebrukers ‘n unieke lierervaring via e speul mèt vief niveaus en aofsletend ‘n Groete Indtoets. D’n app is veur beginnende sjrijvers en experts vaan de Mestreechter Taol. In eder niveau weure kernaspekte vaan de Limbörgse spelling veur ‘t dialek vaan Mestreech kort oetgelag en touwgepas mèt interactief späölselkes. Typisch Mestreechse wäörd wie ‘roojem’, ‘zjeniaol’ en ‘pumpele’ zörge daobij veur ‘nen herkinbare en späölsen insteek. D’n app is gratis besjikbaar veur zoewel Android- es Apple-gebrukers.

‘ne Belaankrieke stap veur de Limburgse taol

Regionaol taole wie ‘t Limbörgs stoon mie en mie in de belaankstèlling. Zie drage neet allein bij aon ‘t cultureel erfgood, meh versterke ouch de regionaol identiteit. “Mèt dezen app zètte veer ‘ne belaankrieke stap veur ‘t behaajd en de promotie vaan eus taol. Door digitaol technologie en gamificatie in te zètte, make veer ‘t liere sjrieve devaan aontrèkkeleker veur joonk en aajd,” zoe Carlo Schrijnemaekers, veurzitter vaan Veldeke Krink Mestreech, en Yuri Michielsen, veurzitter vaan de Limbörgse Academie.

Meugelekhede veur aander dialekte

Speulentere Spelle is tot stand gekoume in opdrach vaan de gemeinte Mestreech. D’n techniek is oontwikkeld door ‘t Mestreechs bedrief Goal043. De technologie en liermethodiek achter d’n app zien zoe ineingezat tot ze in de touwkoms ouch touwgepas kinne weure op aander dialekte vaan ‘t Limbörgs. Mie informatie is te vinde op www.speulenterespelle.nl.