Nuie boondel mèt korte verhaole vaan Wim Kuipers

“Mit de AU van pien” is d’n titel vaan de nuie boondel Limburgstaolege verhaole vaan Wim Kuipers, dee op zaoterdag 22 november is geprizzenteerd in Bookhandel Dominicanen in Mestreech. Deen titel zeet alles euver de meneer boe-op Wim Kuipers mèt zien taol umgeit. De moos dèkser twie keer leze um te begriepe wat dao steit  meh este eine kier geweend bis aon zien associatief meneer vaan ’t vervlöchte vaan wäörd en gedachte, opent ziech ‘ne wereld vol poëtische energie. “Ich sjrief wäörd en dan zeen ich waal wie die bie-ein komme”, zeet heer zelf dao-euver mèt väöl geveul veur ironie.

“Mit de AU van pien” is de 86ste oetgaof in de serie LiLiLi (Limburgs Literaire Lijst) vaan oetgeverij TIC in Mestreech. Veurzitter Paul Weelen euverhandegde ’t ierste exemplaar aon de sjrijver mèt de opmerking tot de nómmer vaan de lies zjus euverein kump mèt de leeftied vaan de sjrijver. Al had Wim Kuipers laote wete neet zoe gecharmeerd te zien vaan dee nómmer, heer leet ziech dao neet door oet ’t veld sloon en vertèlde op zien eige meneer langs wat veur weeg en zijweeg zie sjrijversleve ziech had aofgespäöld.

En daan neumde heer nog neet ins tot heer winner is gewees vaan de Veldeke Literatuurpries, tot heer de Jo Hansenpries heet gekrege, tot heer de groondlègker is gewees vaan de serie Platbook en tot heer redactielid is vaan ’t Limburgstaoleg poëziemagazine Veldgewas (boe-euver geer hei mie kint leze).

“Mit de AU van pien” is veur € 14,90 te koup in alle groete Limburgse bookhandels en kint online bestèld weure bij d’n oetgever Tic/LiLiLi.