Nuuj Zjwaams kinjerbook:  De Avonture van Kuulköpke

Nuuj Zjwaams kinjerbook: 

De Avonture van Kuulköpke

 

Zjwame – Nao ‘t bedinke, óntwerpe, aanpasse en proofdrökke is ’t zowied: Ferd Geerlings presenteert zien nuuj kinjerbook De Avonture van Kuulköpke, gans in ’t Zjwaams dialek gesjreve.

‘t Book tèlt 60 pagina’s vol kleurrieke teikeninge en 2 eenvoudige verhäölkes veur kinjer van 3 tot 8 jaor en alle luuj die Zjwame of de Limburgse taal leefhöbbe.

De prizzentasie is op zaoterdig 21 november tiedes ein biejeinkóms van Vastelaovesvereiniging de Hopsjlokkers Zjwame. Dao reik Ferd ‘t eerste eksemplaar oet aan Huub Verstappen, 6×11 jaor jubelares biej de Hopsjlokkers.

Huub is de zoon van Sjeng Verstappen, dae in 1953 ’t figuur Kuulköpke bedach.

Nao de prizzentasie is ‘t book te koup biej Van Heijster Kantoor & Boekado in Zjwame. Daobiej is ‘t book ouch te koup op zunjig 13 desember tiedes Belaef Zjwame Kers wo Ferd mit eine eige sjtand ouch aanwezig is en ‘t book perseunlik zal signere. De bedoeling is om jaorliks ein book mit 2 verhäölkes oet te gaeve toet edisie 11, ‘t tradisionele gèkkegetal van de Vastelaovindj. Mit dit eerste book wil Ferd ‘t Zjwaams laevend haje biej de jóngste generasie: Veurlaeze in eige taal, zo wiej ‘t thoes klink.

 

Contact / info: 06-21212542