Op zeuk nao enthousiaste jonglui veur ’t TikTok projek

Veldeke is op zeuk nao jonglui die ’t leuk vinde um Limburgstaolege TikToks te make en die te deile via ’t Veldeke TikTok account! Eder Limburgs dialek is welkom.

TikTok is ‘ne populaire sociaol medium app veur ’t make vaan korte, creatief fèlmkes, die hiel trendgeveuleg zien. ’t Is ’n meneer um creatief bezeg te zien. Of ’t noe geit um lollege fèlmkes, denskes of oetdaoginge, jonglui vinde ’t erg leuk en de fèlmkes weure dèks good bekeke. Hei-in zien veer dus ‘ne kans um ouch op dit platform de Limburgse taol op ’n hiel liegdrempelege meneer mie oonder d’n aondach vaan jonglui te bringe.

’t Projek weurt gecoördineerd door Limfluencer Lotte oet Limburg, die de jonglui begeleit en oondersteunt bij ’t make vaan de fèlmkes.

Höb geer (klein)kinder of kint geer jonglui die ’t leuk zouwe vinde um mèt te doen?

Ze kinne zelf bepaole wat veur fèlmkes tot ze leuk vinde um te make. Die zalle daan gedeild weure op ’t TikTok-account vaan Veldeke.

Um te beginne kriege jonglui ouch ’ne gratis TikTok workshop aongebooje, boe-in ze al hun ierste eige Limburgse TikToks goon make.

Wee mèt wèlt doen kint ’n DM (direk beriech) sjikke nao @lotteuitlimburg op TikTok of Instagram, of häör maile mèt de kontakgegeves via lotteuitlimburg@gmail.com. Mètdoen kint vaanaof alle leeftije.

Limburgse compeminte,

lotte oet limburg
limfluencer