“Ouch det nog! What now?” geprizzenteerd door Veldeke Remunj
“Ouch det nog! What now?” Det is de titel van ’t tweetalige (Ingels / Remunjs) beukske det op 2 mei 2025 is geprizzenteerd door Veldeke Remunj tiedes ’t aafsjeid van Cathy OKelly es archiefmitwèrkster bie de gemeinte Remunj. De van oorsjpróng Ierse Cathy sjreef ’t verhaol in ’t Ingels en gaof ’t aan Veldeke Remunj óm ’t te vertale in ós plat. Ouch teikende ’t de grappige plaetjes van meneer Dinges zelf.
Sjtèl dich ‘ns veur det se lekker sjteis te doesje en det de ganse tied de bel geit. Wils se den waal of neet wete waem d’r veur dien deur sjteit. Lach mer èns lekker mit al dae pech van meneer Dinges.
Veldeke Remunj vónj ‘t sjoon óm ouch ’t oorsjprónkelik Ingelse verhaol in dit beukske op te numme en d’r ’n tweetalige oetgaaf van te make. Wo guf ’t zoget! ’t Beukske is bedoeld óm veur te laeze aan kienjer van róndj de 6 – 7 jaor, zelf te laeze veur kienjer van 8 -9 jaor. Ajer kienjer van 10 toet 100 jaor laeze natuurlik de Ingelse versie zelf en vergelieke die mit de Remunjse.
’t Sjakele tösse meerdere tale bevordert bie kienjer de krejativiteit, ’t geheuge en de kónsentrasie. ’t Eerste deil van dit beukske is in ’t Remunjs en ’t tweede deil is in ’t Ingels gesjreve. ’t Bezunjere van ’t beukske is det t’r gein Nederlands deil is.
’t Idee veur ’t beukske kwoom toet sjtand door ’n toevallige ontmoeting en ’n gezellig gesjprek op ’t sjtadhoes van Remunj in de veurbereiding van de tentoonsjltelling “Remunjs zo gek nog neet” (te zeen in ‘t Historiehoes aan de Neersjtraot van januari – juli 2025). Jos Even tróf toen de van oorsjprong Ierse Cathy OKelly. Cathy woont en werk al meer dan dertig in Remunj. Ze sjprik minstes vief versjillende tale. ’t Remunjs versjteit ’t prima! Bie gelaegeheid van häör pensjenering wól ze dit door häörzelf gesjreve en geteikend door Veldeke Krink Remunj laote oetgaeve. Marly Wiermans dees de vertaling nao ’t Remunjs en Hans Simons waas verantjwaordelik veur de vormgaeving.
’t Beukske is vanaaf 6 mei te koup bie ós bekènde verkoupadresse: Bruna en Boom oppe Neersjtraot, De Póppedokter op ’t Munsterplein, De Kleine Tovenaar in Neel en Van Heijster in Zjwame. ‘t Beukske kos €13,50. De veurraod is beperk!
Cathy OKelly (auteur), Riky Simons-Jülicher, Hans Simons,
Marly Wiermans en Jos Even namens Veldeke Krink Remunj.