Piet Aben beneump tot ierelid vaan Veldeke Limburg

Mèt unaniem instumming vaan alle Veldeke Kring is Piet Aben oet Ech beneump tot ierelid vaan eus vereineging Veldeke Limburg. Tijdens ’n bezunder vergadering vaan de Veldeke Krink Ech op 12 aprèl jl. woorte häöm door veurzitter Reg van Loo de iereteikens opgespangk. Veurmaoleg bestuurslid vaan Veldeke Limburg Pieter Ebus laod ’n laudatio veur, die geer hei kint naoleze.

Piet Aben is in Ech neet allein bekind vaan Veldeke meh heet ouch zien spore verdeend in ’t oonderwies op de basissjaol Schilberg in Pey en bij de famfaar Sint Joseph. Meh veur Veldeke waor heer bezunder actief: vaanaof 2001 waor heer  bestuurslid vaan Veldeke Krink Ech, vaanaof 2008 vice-veurzitter van de Krink, vaan 2003 tot 2020 oontwikkeleer en docent vaan de Cursus Laeze en Sjrieve in ’t Echs, heer zaot same met Ton Janssen in de redactie vaan ’t Bronsgreun bukske, waor vaanaof 2010 de kaartrèkker vaan de Declamatiewedstrije in Ech en Söstere en nog väöl mie.

Mèt ander wäörd: dat ierelidmaotsjap heet heer dik verdeend. Op de foto vaan links nao rechs: Reg van Loo, Piet Aben en Pieter Ebus.