Pieter Ebus ierelid Veldeke Limburg

De Algemein Ledevergadering vaan november 2024 heet euze veurmaolege penningmeister Pieter Ebus vaanwege langjaorege verdeenste veur eus vereineging, beneump tot ierelid. Tijdens de vergadering heet veurzitter Reg van Loo häöm ’t daobij behurende iereteike op z’n revers gespangk.

Reg van Loo teikende aon tot Pieter neet allein mie es twinteg jaor nao vol contentegheid penningmeister vaan Veldeke Limburg is gewees (Pieter zelf neumde ziech altied spottend “centefoekser”). Meh Pieter heet ziech ouch op tal vaan ander terreine ingezat veur Veldeke en veur de Limburgse taol. Heer waor es lid vaan de Activiteitekemmissie oondermie betrokke bij de jaorlekse Declamatiewedstrijd veur basissjaolkinder en bij de jaorlekse viering vaan d’n Daag vaan de Moojertaol op 21 fibberwarie.

En Reg prijsde ouch zien empathie en bereidheid um altied veur andere op te koume en in te valle. Dat bleek mer weer ins wie ziene vaste compagnon Henk Buskes door krengde oonverwachs al zie werk moos neerlègke en Pieter dat – ouch al had heer ’t drök genóg met zien eige taken – zoonder te klaoge euvernaom.

Mèt ander wäörd: ’n terechte beslissing um häöm tot ierelid te beneume. En oeteraard vergaot Reg van Loo neet um ouch de vrouw vaan Pieter te bedaanke mèt ’ne bössel blomme. Gans aofsjeid numme vaan Veldeke Limburg kós Pieter toch neet euver zien hart verkriege: tot 2026 is heer nog actief lid vaan de Zjubeleikemissie die ‘t 100-jaoreg bestoon vaan Veldeke tot e groet fies geit make.