Plat-eweg Platbook

’t Bekinde L1-radioprogramma Plat-eweg, boe in Henk Hover Limburgstaolege meziek prizzenteert en propageert, heet sinds kort ’n nui rubriek: Plat-eweg Platbook. Edere zaoterdag (en ’s maondags in de herhaoling) leus ‘ne Limburgstaolegen auteur e stökske veur oet eige wèrk. Dat zien gediechte of verhaole die ieder gepubliceerd zien in Platbook, ’n serie haafjaorlekse beukskes die Oetgeverij TIC in samewèrking mèt Veldeke noe al mie es 10 jaor deit versjijne.

Eder Platbook heet ’n eige thema en Limburgstaolege sjrijvers kinne nao aonleiing vaan dat thema wèrk insjikke wat beoordeild weurt door ‘nen deskundege redacteur. Dee redacteur (edere kier ‘nen andere en de lèste kier waore dat zelfs twie redacteure) maak ’n käös oet wat nao zien of häör meining de bèste tekste zien en die koume daan in dat Platbooknómmer.

Henk Hover heet noe ’n deil vaan die sjrijvers oetgenudeg in zien studio um opnaomes te make vaan wie ze get vaan eige hand veurleze oet Platbook. Tot noe touw zien de volgende sjrijvers te hure gewees en geer kint door op hunne naomte klikke nog ins beluustere wat ze zoe al te vertèlle hadde.

  • Felix Stelten leus twie vaan zien gediechte veur in ‘t Zittesj.
  • Maurice Hintzen leus zie verhaol “D’r Joep hat doeësj” veur in ‘t Kirchroatsj.
  • Arno Kierkels kump oet Baoksem en leus e gediech veur euver e Leveroys popfestival.
  • Phil Schaeken leus in ‘t Zittesj e gediech veur euver de Maos.
  • Wim Heijmans leus zie verhaol “Driefhoots” veur in ‘t Kirchröätsjer plat.
  • Leonne Cramer leus twie van häör verhaole veur in ‘t Gelaens.
  • Annie Schreuder-Derks mèt häör verhaol “Meziek” in ‘t Sösters.