PLAT! Soapserie en fèlm veur Limburgse jäög

VeldekeKids prizzenteert oonder d’n titel PLAT! ‘n soapserie en ‘ne speulfèlm euver, door en veur jonglui in Limburg. Nao ‘n serie audities zien jong acteurs en actrices oet de ganse provincie gelesecteerd, boedoor ouch ‘nen hieleboel versjèllende Limburgse dialekte te hure zien. Typische jongere-oonderwerpe wie leefde, drugs, peste, studie, ambities en aofguns stoon centraal in de 8-deilege soapserie en de op basis daovaan gemaakde fèlm. ‘t Verhaol geit euver twie compleet versjèllende middelbaar sjaole die fusere en vertèlt vaan bótsende jong lui die vaan d’n eine kant zörge veur escalaties en vaan d’n andere kant veur greujende (sjien)vrundsjappe.

De opnames höbbe plaotsgevoonde in 2016, ‘t jaor boe-in Veldeke häör 90-jaoreg zjubelei vierde. ‘t Blaricumcollege in Blerick funcgeerde es decor. De fèlm geit op 13 fibberwarie in première in de Royal Servicebioscoop in Ech en is wijer nog te zien in ‘t Parkstad Limburg Theater (15 fibberwarie) en de CityCinema in Vinlo (14 en 15 fibberwarie). De soapserie is in de loup vaan ‘t veurjaor via YouTube te bekieke. Neve oonervare acteurs en actrices speule ouch professioneel artieste ‘n rol, boe-oonder Susan Seegers, Henk Hoover en Tom Doesborg. D’n herkinningstune weurt gezoonge door Katja Henz en Dwayne Horbag en dee kint geer hei beluustere.

← Ga terug