Podcast: De Limburgse taol & mietaolegheid

In opdrach vaan de Stiechting LIMx en mèt financieel steun vaan de provincie Limburg en Veldeke Limburg make Ruud Kleinen en Harry Rouschop ‘ne podcast euver de Limburgse taol: “De Limburgse taol & …”. Zie oonderzeuke wat veur rol ’t dialek späölt in de Limburgse maotsjappij. Frans Pollux maak veur eder aoflievering ‘ne muzikaole column.

Aoflievering 7 vaan de podcast, boe-in mietaolegheid centraol steit, is noe te beluustere. Te gas zien Petra Stienen en Cindy Brock. Petra Stienen, publicis, spreker, adviseur en politica sprik zeve taole, inclusief Limburgs. In ’t Midde-Ooste, boe ze wèrkzaam waor es diplomaat, oontdèkde ze de leefde veur ’t Limburgs dialek. Door lezinge, beuk, columns en exposities gief zie die leefde veur Limburg door. Nuikoumers höbbe e speciaol pläötske in häör hart.

Veur Cindy Brock, directeur vaan de multicultureel Vincent van Goghsjaol in Remund, is mietaolegheid daogelekse kos. Op häör sjaol zitte kinder mèt 50 versjèllende cultureel achtergrun. ‘ne Gróp lierlinge volgde oonder leiing vaan juffrouw Etty lèsse euver de Limburgse taol en cultuur. E succes, zoe bleek. De volgende gróp nui Limburgers steit al te trampele um deil te numme.

Ouch dees aoflievering weurt weer aofgeslote mèt e muzikaol dessert vaan Frans Pollux. Alle aoflieveringe zien te beluustere via deze website en via versjèllende podcastplatforms boe-oonder Spotify, Apple Podcasts, Google Podcast en Anchor. Eder 14 daog versjijnt ’n nui aoflievering.

 

← Ga terug