Poëzie bij Witten Donderdag

Phil Schaeken oet Sittard sjrijf zien gediechte bij d’n tied. Zoe ouch vendaog, op Witten Donderdag. En heer is optimis, wie ziech dat huurt es Paose en de Lente naoder koume. Lees mer ins wie sjoen poëzie in de Limburgse taol kint zien.

Nog Ummer

Nog ummer wurt d’r brood gebraoke
róndjgegaeve óngerein
nog ummer geit de baeker róndj
hie, pak mer aan, bès neit allein.

Nog ummer brent veur ós ’t leich
hink hae dao aan ’t kruuts
nog ummer is veur jeder haop
ouch nao väöl sómber nuuts.

Nog ummer geef ‘t sjoon verhaole
es te mer wils heure
ze helpe dich mesjiens op waeg
ze äöpene weier deure.

Nog ummer geef ’t dao de zón
dat kèndj, die millodie
nog ummer geef ’t eine sjtoul
kóm, sjuuf ‘m d’r mer bie.

Nog ummer geef ’t op dees welt
genóg óm veur te laeve
d’róm sjtaek dien henj neit in de lóch
doe höbs zoväöl te gaeve.

Phil Schaeken

Phil Schaeken is eine van de Limburgse sjrijvers die hun gediechte opsjikke nao Veldgewas, de poëzieblog vaan Wim Kuipers. Veldeke is bezeg same mèt Wim Kuipers ’t Arsjief vaan Veldgewas gans obbenuits te ordene en touwgaankelek te make. Daan kinne veer nog ins genete vaan wat de aofgeloupe jaore in Limburg aon poëzie is geproduceerd. Veer hawwe uuch op de huugde.

← Ga terug