Prizzentatie Platbook 20: Det sjmaak nao mier

Op zaoterdag 17 november aonstaonde um 15.00 oor weurt in kaffee ’t Maashuuske in Illikhove Platbook 20 geprizzenteerd. ’t Thema vaan dit 20e deil in de serie blomlezinge in ’t Limburgs is “Det sjmaak nao mier”, boebij aon alle gooj dinger in ’t leve is gedach en zeker neet allein aon culinair specialiteite. Redacteur Ronald Colée selecteerde veerteg tekste oet in totaal bekans negeteg inzendinge oet de ganse provincie. Dao-oonder zien bedreve auteurs die al ‘ne gooje naom höbbe opgebouwd in de Limburgse literatuur, meh ouch versjèllende nuikoumers. ’t Thema kump op alderhand menere trök in Platbook 20, wat opvallend väöl poézie en e paar prozastökker bevat. Ronald Colée: “Iech hob miech mage laove aon wäörd wie boajbreukske, koekake, krollemol, klevièterkes, rainiejoeng en zevezöldersgezich en dat sjmaakde good.”

Auteurs in Platbook 20

Platbook 20 bevat werk vaan Wiel Roeselers, Marleen Schmitz, Vivianne Rijnders, Marloes Lammers-Hoekstra, Colla Bemelmans, Frans Adriaens, Mia Engels, Mien van Wijnhoven, Annie Schreuders-Derks, Jessie Spin-Schlicher, Leonne Cramers, Mariet van Knippenberg, Jan Widdershoven, Lisa Naus, Marjo van Es-Jaspar, Els Zeegers-Koelen, Els Diederen, Anne-Marie Webers-Wesels, Annie Tummers-Huppertz, Riky Simons-Julicher, Piet Nieuwenhuizen, Jo van Es, Riny Muyres-Engels, Jan Titulaer, Har Sniekers, Fer Hellenbrand, Guus Kitzen, Wim Kallen, Miranda Meuwissen-Vergoossen, Tjeu Wetzeler, Ton van Wegberg, Loek van de Weijer, Wiebe de Vries, Frans Hendriks, Arno Kierkels, Jan Feijen, José Beumers, Dorrie Satijn, Harie Wetzelaer en Iene van Dale.

Euver Platbook

Platbook is bedoeld veur Limburgstaolege sjrijvers en – lezers. De boondels weure oetgegeve in opdrach vaan ’t Hoes veur de Kunste Limburg in samewèrking mèt Veldeke Limburg, de Raod veur ’t Limburgs, de Stiechting Lilili, oetgeverij TIC en Wim Kuipers. Auteurs oet de ganse provinjcie wèrke mèt um ederskies ’n ander thema te besjrieve in hun eige verhaole, gediechte en andersoortege tekste. Platbook 20 is evenes alle veurgaonde nómmers veur € 9,90 te koup in versjeie Limburgse bookwinkels, en ouch via de websjop vaan Oetgeverij TIC

Euver de redacteur vaan Platbook 20

Redacteur Ronald Colée is in ’t daogeleks leve journalis bij de gezèt De Limburger. Heer woort gebore in Born en sjrijf zelf ouch gere in ’t Limburgs. Heer stoont al ‘ne kier in de finale vaan ’t Limburgs Vastelaovendsleedsjes Konkoer (LVK) mèt e zelf gesjreve leedsje.

← Ga terug