Pyure bringk Cohen en Cassidy in ’t Limburgs

’t Trio Pyure trejt op zoondag 28 oktober op in de ECI Cultuurfebrik in Remund mèt in ’t Limburgs vertaolde tekste vaan Leonard Cohen en Eva Cassidy. De CD “Pyure Haalleelloeyaah, Cohen in ’t Limburgs” waor in 2017 aonleiing veur ’n serie theaterveurstèllinge in Limburg en daoboete.

Es ambassadeur vaan ’t Limburgs dialek späölde Jos van Rens de leedsjes tot in Friesland in opdrach vaan Leeuwarde Cultureel Hoofstad Europa 2018 en de Provincie Limburg. Es touwvoging aon de leedsjes vaan Cohen besloot Jos leedsjes die ieder vertolk waore door Eva Cassidy mèt te numme in ’t program, ’n oerverwenend concep.

Zoondag 28 oktober beejt ECI Cultuurfebrik Remund e podium veur de luuster- en kleurrieke meziek vaan Leonard Cohen en Eva Cassidy, vertolk door Pyure. Laot uuch aongenaom muzikaol verrasse door zenger/gitaris Jos van Rens, zangeres Wietske Boesveld en de befaomde pianis Remko Boesveld. Dit uniek trio späölt de muzikaol perelkes oet ’t rippertoire vaan Leonard Cohen en Eva Cassidy zoe zuver wie zwart ies en zach wie doons.

← Ga terug