Schuuërkalender 2025 van Veldeke Wieërt te koup

De nowwe kalender vör 2025 és klaor. ’t Ieërste exemplaar és op ’t stadhoês aangeboeëje aan wéthaojer Thomas van Gemert. De vertrawdje uutveuring mét aldaag e gezagdje, de vertaling daovan en e woeërd vannen daâg. Beej edere nowwe maondj ’n schoeën foto of teîkening in kluuër van ’n plânt mét ziene apaarte Wieërter naam. Zoeë hejje d’r e jaor lânk plezeer van.

De drökköste vleege umhoeëg en daorum hebbe ve nao jaore de priês motte aanpasse. Inne wînkels ligktje vör € 15,00, mer vör oeës lede en begunstigers doon ve altiêd wat extra’s. Gae kuntj kalenders aafhale vör de ledepriês van € 13,00 per stök. Vör femiêlie en vreende moogdje d’r ouch mejneme.