Stadswandeling Veldeke Krink Venlo

In naovolging op de Verrassende Stadswandeling van augustus 2018, organiseert Veldeke Venlo dit jaor weer ’n stadswandeling.

De meiste stadswandelinge speule zich aaf in ’t alde centrum van Venlo, eigelik binnen de alde more van de stad. Ós leek ’t dan ouk ’n oetdaging, maar eigelik ouk ens tied, um ‘n stadswandeling boete de alde more van de stad Venlo te organisere. Weej hebbe dan ouk ’n wandeling inein gezatte um en rónd ’t Villapark (Wilhelminapark), dao wao ’t vrugere Fort Ginkel gelaege haet. Tiejes dees wandeling zal de historie van ’t Villapark, maar ouk die van de umgaeving oet de deuk gedaon waere.

Zoeëas vurrig jaor dinke weej dees wandeling te doon in 2 groepe van maximaal 25 man per groep. Dees wandeling geit plaatsvinde op zóndaagmiddaag 25 augustus 2019. Dae middaag zal d’r (ónder veurbehald van meschiens inkele kleine wieziginge) as volg oetzeen.

  • 13.30 – 14.00 oor Inloup baove beej Beej Benders aan ’t Gaasplein met ’n tas koffie
  • 14.00 – 14.30/45 oor Dia/powerpoint prissentatie euver ’t villapark en umgaeving door Paul Seelen
  • 14.30/45 oor Start wandeling in 2 groepe
  • 16.00/15 oor Ind van de wandeling

Veur dees wandeling kint geej óg wies 19 augustus 2019 inschrieve met maximaal eine introducé via: de website van Veldeke Venlo . De eige beejdrage veur dees wandeling bedruueg € 7,50 pp, beej aanvang van de middaag beej Beej Benders aan de organisatie te voldoon.

← Ga terug