Väös kin neet op vekantie

Väös kint dit jaor neet op vekantie want heer heet zienen erm gebroke. Dat is ’t thema vaan de ansiechskaart die Veldeke Krink Mestreech heet roondgedeild aon 6000 kinder vaan de basissjaole in de stad. Via die kaart weure de kinder oetgenudeg um Väös te vertèlle wat zie op hun vekantie höbbe gedoon of mètgemaak. Zoetot Vaös ouch nog e bitteke plezeer heet. De kinder mage e verhaol insjikke, of ’n teikening of ’n foto of e fèlmke. En hun weurt ouch nog gevraog e sjoen Mestreechs woord te bedinke veur typische vekantie-attribute wie ‘ne barbecue, zonnebrandcrème, badminton of slippers.

De kaart is in twie taole, Nederlands en Mestreechs gesjreve. En Väös is netuurlek geneump nao de stadsheilege vaan Mestreech Sintervaos. Eder keend wat get insjik krijg vaan Väös e klein kedoke en de leukste en origineelste inzending krijg ‘nen echte pries. De winners weure  bekind gemaak via Facebook. Ze zien bij Veldeke Mestreech hiel benuid nao de reacties. En es ’t euver verjonging geit: wee wèt wat die sjaolkinder nog goon beteikene es ’t um de Mestreechter taol geit.